Biaksanga hoin BVT an sang zel

Bethlehem Vengthlang FC-in nimin tlai khan Lammualah Dinthar FC 2-0 in an hneh a, Mizoram Premier League Season 5 hmahruaitu an ni leh ta. Armed Veng pa Lalbiak-sanga Colney (BS-a) enkawlna hnuaiah BVT-in hneh loh an la tawng lo a, match nga khelh
aṭangin point 13 an hmu tawh.

MPL champion hmasa ber Dinthar FC erawh coach thar Lalhlupuia Sailo hnuaia an match hnihnaah point an hlawh chhuak zo lo a, match nga khelhah point hnih chauh la hmuin table mawngphahah an awm.

Dinthar an thar?

Dinthar FC-in player pawi--mawh forward Michael Lalremruata, midfielder Lalhma-chhuana bakah defender Lalremtluanga leh Vanneihtluanga te inhliam vanga an chhawr thei lo chungin bul an ṭan ṭha a, BVT an talbuai hle. Amaherawhchu winger tlan chak Lalruatpuia'n tlarhmaa mal tlat a harsat a, goal khung thei tura a ball hmuh a siam rem theih ṭhin loh avangin Dinthar FC-in BVT keeper Malsawmdawngzela an tibuai pha meuh lo.

Hun tawp lamah Dinthar player-te tawnhriat neih tam lohna a lang a, point hmuh an phu niah an chak zo lo.

BVT an huaisen

Bethlehem VT khelh danah PC Zosangliana a tel loh a lang a, BS-a hote tlar hmaah an hriam lo. Hei chauh hi a ni lo, minute 20-naah captain Laldingngheta chu inhliam vangin lakchhuah a ngai a, defender tharum ngah Laldinpuia chu inhliam vang thoin second half a khel chhunzawm thei lo bawk.

BVT mipuiin an player-te an au phur a, chak duhna thinlung an lantir bawk avangin hun tawp lamah an huaisenna lawmman an hmu.

Substitute Lalmawizuala'n (Ashtea) minute 73-naah Lalthan-zama Fanai leh Lalram-muanpuia (Apuia) te thawhrah sengin goal hmahruai a tauh lut. BVT tlangval Ashtea hian injury time-ah Dinthar midfielder R. Lallawm-awma tihsual nangchingin goal khung tura amah siam saktu Apuia a siam let a, Armed Veng South tlangvalin injury time-ah chak nem nghehna goal a khung.

Eng nge an sawi?

Dinthar FC coach Lal-hlu-puia Sailo chuan, "Kan squad chhah tawk lohna hun tawp lamah a lang a, tih theih kan nei lo a ni. Table mawngphaha awm reng erawh kan tum lo, MPL khel zel turin theihtawp kan chhuah zel dawn," tiin Vanglaini palai a hrilh.

BVT coach BS-a Colney chuan, "Inhliam vangin risk lak a ṭul a, point thum hmuh ngei kan tum avangin khelhtir ka tum miah loh Ashtea pawh kan luhtir kha a nia. Kan vannei a, kan thlen chinah hian kan lawm takzet a ni," tiin league hmahruaitu an nih avanga a lawm thu a sawi.

BVT semi final?

MPL5-a Bethlehem VT result-in tualchhung football ngainatute a ṭhâwng a, zawhna awm ta chu BS-a hote hian match nga chauh la khel chungin semifinal an lut tawh em, tih hi a ni.

MPL1-ah palina FC Kulikawn leh pangana Aizawl FC ten point 20 ve ve a hmu a, MPL2-ah palina Mizoram Police-in point 22 hmuin pangana Aizawl FC-in point 15 an hmu thung a, MPL3-ah palina Chanmari West FC-in point 18 an hmuin pangana Dinthar FC aiin point khatiin an hmu tam. MPL4-ah palina Zo United leh pangana Dinthar FC ten point 17 ve ve an hmu bawk.

MPL season li thlir letin palina ni turin point 20 hmuh hi a tawk niin a lang. BVT hian match kua khelh tur an la nei chungin point 20 an phak lohna chu point sarih chauh a ni. Armed Veng pa BS-a'n Vanglaini palai hnehah, "Phase 1-ah chuan eng team pawh hmachhawn ila, risk kan la ang. Chak tumin kan khel vek dawn," tiin a sawi tawh a, hei vang hian an inkhel apiang a hmuhnawm dawn - phase 1-ah hian BVT hian khelh tur vawi hnih an la nei.

Phase 1-a BVT khelh hmabak chu Chhinga Veng FC leh Chanmari FC te a ni. Champhai-a an khelhpui tur Chanmari coach hi BVT boss hlui Lalsangzuala Hmar a nih bakah an player eng emaw zat telna team an ni - Chhangphut Field-a inkhel tur hian ngaihven a hlawh lehzual ang.

Tute nge inlan?

Bethlehem VT (4-5-1) : Malsawmdawngzela; Lalthanzama Fanai, H. Lalhlimpuia, P.C. Laldinpuia (R. Lalmalsawma 46'), Hmingthanmawia; R. Lalrinsanga, R. Lalrammawia, Lalrintluanga, Zosangkima, Laldingngheta (P.C. Vanlalhruaia 20' (Lalmawizuala 69')); Lalrammuanpuia.

Dinthar FC (4-3-3) : Lalrinhlua; Saihmingthanga, Lawmsangzuala, VL Chhanhima, Stephen Lalnunmawia (George MS Dawngliana 78' (Lalbiakzuala 85')); Biaknia Pautu, Joseph Lalthanfela (R. Lallawmkima 56'), R. Lallawmawma; Samuel Laltlanthanga, Lalruatpuia, R. Lalnunmawia.

ZoFooty Statistics

Bethlehem VT 2 - 0 Dinthar FC

BVT : Lalmawizuala 73'; Lalrammuanpuia 90'+2

MoM : Hmingthanmawia, BVT FC

51% Ball Possession 49%

13 Shots 6

4 On Target 1

3 Yellow Cards 2

0 Red Cards 0

Powered By Rainbow Multibrand

Mobile Showroom