Atletico Madrid chakna goal thuntu French star Antoine Griezmann

Antoine Griezmann chuan tun season-a a goal ngana khungin player 10 a khel Deportivo La Coruna chu 1-0 in an hneh a, a club Atletico Madrid chu point 12 hmuh puiin La Liga table-ah pathumna a nih pui leh ta.

Pathianni zan inkhelah Depor--tivo mid-fielder Faycal Fajr chu minute 45-naah yellow card vawi hnih hmuh vangin hnawh-chhuah a ni a, goal awmchhun hi minute 70-naa forward Griez-mann khung a ni thung.

Diego Simeone-a naute hian tun season-ah hneh loh an la tawng lo a, inelna hrang hrangah match sarih khel tawhin ṭum li hnehna an chang a, vawi thum an khingpuite nen an inhnehtawk - league hmahruaitu Real Madrid nen an inthlauhna chu point hnih chiah a ni mek.

Atletico hian nikum Cham-pions League aṭanga an pet chhuah Bayern Munich chu Nilaini zan hian group match khel turin an lo mikhual dawn a, Deportivo an hneh ṭuma inhliam Jose Gimenez leh Augusto Fernandez te dinhmun a chiang lo.

Pathianni zan hi Argentine manager Simeone tan hun hlimawm bik a ni ngei ang, La Liga lamah a club te hnehna a chanpui rual chiah hian a fapa Giovanni Simeone chuan Serie A-ah a club Genoa tan a vawi khat nan inkhel bul a ṭan a, goal khung nghalin Pescara nen 1-1 in an inhnehtawk.

Valencia chak

Inkhel dangah Valencia chuan an coach Pako Ayestaran an ban hnua an match hnihna khelin Leganes 2-1 in an hneh. Keeper Diego Alves chuan second half-ah Alexander Szyma-nowski-a penalty pet chu dan sakin a team a chhanhim.

Butarque-a inkhelah hian midfielder Szymanowski chuan minute 21-naah goal hma-hruai khungin Valencia tan Man United winger hlui Nani chuan a club thar tana a goal hmasa ber hmangin a sut a, second half-ah Mario Suarez chuan an chakna goal a khung.