Dortmund mikhual tur Real Madrid

Zanin dar 12:15 hian mi-khual tana hmun ralṭi tia sawi ṭhin Signal Iduna Park-ah Real Madrid chu Borussia Dortmund hmachhawn turin an lenglut dawn. Champions League nomawi kawl mektu Spanish club hi Cristiano Ronaldo hoin an thawkchhuak ang.

Group F team lian pahnih hian an league round hmasaah hnehna an chang ve ve a, last 16 lut tura tinkai an ni - group hmahruaitu ni tur chuan an mahni pahnih inkhel result a pawimawh dawn miau avangin inkhel hmuhnawm beisei ila a sual lo tura ngaih a ni.

Real tan fiahna

Zinedine Zidane chuan kartawp La Liga inkhela Ronal-do a lakchhuah chhan chu zanin an inkhel tur hi a thlirlawk vang niin a sawi a, hei vang hian French manager hian a ti mai mai lo tih a ti chiang hle. Real hian tun season-ah hneh loh an la tawng lo a, an league match hnuhnung pahnihah erawh Villarreal leh Las Palmas an inhnehtawkpui a, inkhel pahnih belhkhawmah goal thum chauh an thun avangin an chet dan ṭhin thlirin an ṭhat lai ber a ni lo tih a hriat theih.

Germany-ah hian tun hma aṭangin Real Madrid hian result ṭha an nei khat hle a, vawi 30 an zin chhuah aṭangin vawi li chiah hnehna an chang. Dortmund khelmualah bik hian an lenluh hnuhnung vawi thumah an chak loh vek bawk avangin fimkhur a ṭul hle ang.

Real tan defender Pepe hliam a dam tawh a, hetih lai hian Marcelo leh Casemiro te erawh an inlan a beseiawm loh thung. European champion vawi 11 ni tawh Real hi player pahnih khat inhliam vanga buai tur an ni lo a, a bik takin tlarhma lamah Ronaldo, Gareth Bale leh Karim Benzema te an neih miau avangin Dortmund tlarhnung tan thawhrim a ngai dawn.

Dortmund an ṭha

German club ṭha Dortmund hian Champions League-a sulhnu nei ṭha ber an mikhual dawn avangin an inbuatsaih ngawrh hle ang tih chu a chiang, hetih lai hian sulhnu ṭha sawi tur nei lo an ni bik lo - kum 1997 khan champion tawhin 2013 khan final-ah Bayern Munich lakah an vanduai thung.

Kumin September 10 khan Dortmund hi RB Leipzig lakah 1-0 in an chak lo a, hemi hnu hian an la chesul leh miah lo. Match li khel leh tawhin hnehna an chang fai vek a, hengah te hian goal 20 zet an thun hem mai - Real tlarhnung an awm mai mai thiang dawn lo.

Dortmund hian nipui transfer lai khan an player hlui Mario Gotze chu Bayern aṭangin an lalet a, Chelsea winger hlui Andre Schurrle bakah Rennes aṭangin Ousmane Dembele an lalut bawk. Heng an player thar bakah hian Bundesliga match 100 a khelh aṭanga goal 59 khung thei Pierre-Emerick Aubameyang an la nei cheu bawk. German winger ṭha Marco Reus chu inhliam vangin chawlh mek mah se Dortmund hi tlarhma lamah chuan an ngaihtuahawm loh hle.