Marc Marquez sang fal zel

MotoGP championship hmahruaitu Marc Marquez chuan Aragon Grand Prix-ah hnehna a chan leh tak avangin point 52 zetin a sang fal ta a, tun season-ah intlansiak hmabak pali chauh a awm tawh avangin an dinhmun a sawh nghet chho zel.

Pathiannia tlan zawh tak AragonGP-ah hian MotoGP vawi hnih champion tawh Marquez hian pole position aṭangin bul ṭan mah se a tir lamah a tlan ṭhat tawk loh avangin panganaah a hnung tawlh hman. Amaherawhchu, Spanish rider hian thapui rawn thawh lehin lap 12 chauh tlan tur a awm tawh tihah Valentino Rossi a lehpel a, kumina a vawi li nan hnehna a chang.

Champion lai Lorenzo chuan lap nga tlan hmabak a la awm tihah Rossi rawn tlan pel veiin pahnihna a ni a, pakhatna ni thei dinhmuna ding hman Italian rider hi pathumnaah a thleng thung a ni.

Kum 23-a upa Marquez chuan, "Rossi hian zawi muangin point a khawl khawm ṭhina, vawiinah kan chhutchah sak theih avangin a lawmawm hle. Ani lehpel tur khan a bik takin lap hnih chhung kha chu thil dang engmah ka ngaihtuah hman lo," tiin Italian rider nena an inelna hautak thu a sawi.

Rossi hian parukna aṭanga bul
ṭanin hmahruaitu te ni pha hial mah se a tawpah erawh Honda rider Marquez leh a teammate Jorge Lorenzo hnungah a awm.

Kumina intlansiak vawi 14 awm tawh aṭangin Marquez (248) chu hmahruaitu a ni a, Spanish rider hnungah Rossi (196) leh Lorenzo (182) te an awm. October 16 khian Japanese Grand Prix an tlan leh ang.