Zaninah point li hmu tawh pahnih Ramhlun North Vs Chanmari West
Tun dinhmuna Mizoram Premier League table awm dan thlirin Ramhlun North emaw Chanmari West emaw tan semifinal-ah hmunruak pakhat chiah a awm. Champion lai Aizawl FC player neih dan te, Chanmari FC leh Bethlehem VT point hmuh tawh dante bakah Chhinga Veng player lakluh dan thlirin season tawpah club pahnih tan semifinal-ah hmun ruak siamsak an nih a rinawm loh.
Hei vang tak hian zanin dar 7:00-a Ramhlun North leh Chanmari West inkhel tur hi hmalam hun thlir thiam tan chuan semifinal luh inchuhna ang hialah a ngaih theih a, inkhel pawimawh a ni.
West Warrior leh Goal?
Chanmari West-in an match hnuhnung berah goal an khung thei lo a, Zo United nen an inhnehtawk. Hemi ṭum hian forward-ah Lallianzama aiah tawnhriat nei tlem zawk Lalmuanzuala thlan a ni a, Lengpui tlangval Muanzuala a puitling tawk lo.
Coach H.C. Zarzoliana thu-tlukna siam dan erawh hriatthiam pui theih tak a ni thung a, Lianzama hian Dinthar FC 4-0 an sawp
ṭumin goal a khung bik lo. West Warrior tan winger pahnih R. Laldanmawia leh Laldampuia te chu goal khung kawngah an pawimawh a, Ramhlun North coach Lalruatliana Sailo (Tawia) pawhin, "Dampuia leh Danmawia te khelh ṭhat ni chuan anni aia ṭha MPL-ah an awm bik lo," tiin a khingpui tur winger-te hi a fak nghe nghe.
Chutihrualin Tawia hi a zam tihna a ni lo, I Day Football final-a Ramhlun North thlenpuitu coach chuan, "A ven dan tur chu kan nei ang," tiin Vanglaini palai a hrilh.
MPL kaithar hian an match hnuhnung bera Chanmari FC an hneh loh ṭumin goal thum lai chhuah mah se an goal chhuah hmasa ber hi second half minute 57-naah chauh a lut - hei bakah hian an defender pawimawh pathum chu inhliam vangin an khel thei lo bawk.
I Day Football anga Tawia nauten an hna ṭheuh tlin taka an khelh leh chuan Chanmari West-in match zawnin goal an khung lo thei a, mah se Zara erawhin goal khung a tum ruh.
West Warrior coach Zara chuan, "Ka tlar hmate kan tat hriam lauh lauh chu a nia, goal kan khung ngei pawh ka ring," tiin a inringtawk hle.
Chhaia a pawimawh
Ramhlun North innghahna chu Zosangliana (Chhaia) a ni a, I Day Football best player hian Dinthar FC an hneh ṭumin goal awm chhun a khung. MPL kaithar leh BVT inkhelh ṭumin Chhaia'n beisei a pha lo a, goal awm loin an inhnehtawk.
Armed Veng South tlangval Chhaia hian an match hnuhnung bera Chanmari FC an hneh loh ṭumin goal hmahruai a khung a, second half-ah a lansarh zui loh avangin Ramhlun North an chak zo lo. MPL kaithar Chhaia a pawimawh tih a chiang a; amah-erawhchu Tawia nauten result ṭha neih an tum a nih chuan tlarhma lam-a awm Vanlalthlamuana, MC Mal-sawm-zuala leh B. Mal-sawmzuala ten khelmualah an tawnhriat neih
ṭhat an lantir ve a ṭul ang.
Chanmari West coach Zara chuan, "Team ṭha pawl tak an niin ka hria, zuam chi an ni lo. An team hi an combination a ṭha riau a, chak tur chuan theihtawp kan chhuah a ngai ang. Point hloh theihna an nih avangin kan fimkhur a ṭul ang," a ti.
Hu hu hu!
Ramhlun North ṭantuten MPL ṭan hma an pha lo a, an result pawhin a tuar. Chutihrualin ṭantu nei ṭha lo erawh an ni lo, zanin pawh hian West Warrior au zam turin an thawk chhuak ṭha leh ang.
Chanmari West pawh MPL kaithar laka 'mei khup' tur chi an ni lo a, an khuang pui nen Ramhlun North ṭantuten 'Hu Hu Hu' an tih huna au let turin an inpeih ang.