Spurs mikhual turin Moscow inpeih

Zanin dar 12:15 hian Tottenham chu CSKA Moscow luhchhuah tumin Arena Khimki-ah an leng lut dawn a, hmanni lawka hawn thar stadium-a Champions League khel tur club pahnihte hi an vawi khat intawnna tur a ni bawk.

Mauricio Pochettino hnuai hmasawn tak Spurs hian kartawp inkhelah hliam vangin Eric Dier, Mousa Dembele, Danny Rose leh Harry Kane te chhawr thei lo mah se Middlesbrough 2-1 in an hneh thei tho.

Russia-ah hian nipui laia an lakluh Moussa Sissoko a inlan ngeiin a rinawm a, Dier leh Rose te pawh a ṭul a nih chuan chhawr theih an ni tawh bawk. Hetih lai hian Argentine manager Pochettino chuan a player dam chiang lo lakah risk a lak loh tur thu a sawi.

Tottenhman hi Premier League-ah pahnihna an ni mek a, match ruk khelh tawhah chak loh an la nei lo. Hetih lai hian kumin Champions League-a an match hmasa zawk chu Wembley-ah khelin an mikhual AS Monaco lakah 2-1 in an tlawm a, group stage paltlang tur chuan a zawna chetsual a fuh lo hle ang.