Ranieri leh Foxes tan fiahna

Claudio Ranieri-a'n season hmasa khan khawvel barakhaihin Premier Lea-gue-ah Leicester City a champion pui. Italian mana-ger ho hian kuminah Champions League-ah inlanin an thlen chin apiang hi history a ni zel.

Zanin dar 12:30 hian King Power Stadium-ah Proto an lo mikhual dawn a - Foxes hian thawnthu hlimawm nge lungngaih thlak an ziah chhunzawm dawn tih hriat a châkawm tawh hle.

Foxes hian Champions League-a an match hmasa berah Club Brugge chu 3-0 in an sawp thei a, zanina an mikhual Porto erawh European champion vawi hnih ni thei an nih avangin an match hmasa ai chuan a khirh deuh ngeiin a rinawm.

Kartawp inkhelah Leicester hi Old Trafford-ah 4-1 in an mualpho a, an goal chhuah zawng hi first half-a lut vek a nih avangin second half-ah Jamie Vardy leh Riyad Mahrez te chu chawlhtir an ni. Porto laka hnehna chang tur chuan England international leh PFA player of the year Mahrez te hi an khelh ṭhat a ṭul ang.

Kum 64-a upa Ranieri hian Man-chester United an hneh loh hnuah season hmasaa an rilru puthmang ang kha neih leh a chak thu a sawi a, goal an chhuah hnua an tha zuai vek mai chu a hrethiam lo - a nauten an theihna zawng zawng an hlan lo niin a hria.

Ranieri chuan, "United lakah corner aṭangin goal thum kan chhuah a, kha chu kan rilru kan pek tawk loh vang a ni. Chak loh rilru nguai kha kalsanin Champions League thlir a ṭul zawk," tiin a sawi. Vardy leh Mahrez te chu an chak loh chian tawh avanga chawlhtir a nih thu a sawi tel bawk.

Season hmasa khan Leicester hian league match 38 aṭangin goal 36 chiah an chhuah a, an tlarhnung an rem phui takzet. Tun season-ah erawh league match ruk an khelh tawh
aṭangin goal 11 zet an chhuah tawh a, defensive midfielder N'Golo Kante hmunruak hnawhkhat tur an nei rih lo niin a ngaih theih - zanin hian an inremkhawm fuh thei ang ngem tih chu chhanin a awm dawn.