Zo United leh Chanmari an intiat?
Chanmari FC-in Mizoram Premier League Season 5-ah match li khel tawhin point 10 an hmu a, Zo United erawhin point hnih chauh an la hlawh chhuak thung. Table-a an awmna thlirin chung leng leh hnuai leng tih theih tur ni mah se thla hmasaa MFA Super Cup-a an inkhelh tawhna aṭanga thlir chuan Chanmari FC an lian bik lo.
Vawiin tlai dar 2:30 hian Zo United leh Chanmari FC te Lammualah an inkhel dawn a, hmahruaitu ni tura Lalsangzuala Hmar hote point mamawh hi Vanlalrova hoten table mawng lam aṭanga talchhuahna atan an mamawh ve tho.
Malsawma tel loin
Zo United defender Mal-sawma Chhangte-in match li khelhah yellow card a la hmu vek a, hrem vangin Chanmari FC a hmachhawn thei dawn lo. Inhliam vangin coach Rova'n midfielder Laldinmawia chhawr thei dawn lo mah se Chanmari West aṭanga an lakluh forward Lalnunsanga (Tale-a) a dam tawh avangin lawmna tur an nei tho.
Zo United coach Vanlalrova chuan, "Chanmari FC nena MFA Super Cup kan khelhna kha kan thlir let a nih chuan 3-2 chauhin an chak a, a vannei zawkah an ṭangin ka hria. MPL bikah point 10 hmu tawh mah se an inkhelh tawhnate ka en let leh vek a, an khingpuite hneh taka an chak ka la hmu lo. Table-a a chung lama awm theihna chhan hi an vanneih vang a ni pakhatin ka hria, chuvangin kan hlau bik lo - chak tumin kan khel ang," tiin Vanglaini palai a hrilh.
Coach ringtawk CFC?
Chanmari FC manager Mawitea chuan, "Coach ṭha tak kan nei a, game plan ṭha tak a nei bawk. A hnuaiah hian kan match apiang kan chak ngei ngei ang chu ka ti lo a, mah se chak hi kan inbeisei
ṭhin a ni. Kan club hruaituten min ngaihven a, coaching staff-in kan mamawh zawng zawng kan dawng a, an chungah kan lawm hle," tiin coach Sanga chunga rinna an nghah thu a sawi.
MPL2-a Chanmari FC an champion ṭum khan season
ṭantirh aṭangin H. Vanlalthlanga hote kha nomawi chawi tura rinkai an ni a, mipuiin coach chungah rinna an nghat tih langin ṭantu an ngah ṭhin. Chanmari manager hian coach chungah rinna an nghah thu uar takin a sawi a, vawiin tlai hian mipuiin rinna an nghat ve em tih chu a hriat ang.
Chanmari FC-in inhliam vangin defender Lalmuanawma leh forward Lalruatfela Zote te an chhawr thei dawn lo a, amaherawhchu Malsawmfela a dam chuan tlarhma lamah chuan buaina tur a awm lo. Midfielder R. Malsawmtluanga'n training a zawm leh tawh bawk a, Chanmari FC ṭantute 'Shabash' tia Lammualah an zai rual leh a nih pawhin a mak lo ang.