Man United-in ROO an mamawh lo

Manchester United-in captain Wayne Rooney tel loin Premier League champion lai Leicester City lamah goal li an khung a, vawi thum a zawna an chak loh hnuah Jose Mourinho hoten Old Trafford-ah 4-1 in hnehna hlado an chham.

Inrinni zan inkhela mual neitu goal khung hi first half-a lut vek a ni. United captain armband hrengtu Chris Smalling (22'), Rooney aia Zlatan Ibrahimovic hnunga awm Juan Mata (37'), rawl-thar duhawm Marcus Rash-ford (40') bakah khawvel foot-baller manto ber Paul Pogba (42') ten goal an khung.

Second half-ah kum 20-a upa substitute Demarai Gray hian minute 59-naah goal ropui a khung bakah Spanish keeper David de Gea tan hna vawi khat dang a siam sak bawk.

Thutlukna siamtu Mou

Inkhelh hma press confe-rence-ah Jose Mourinho chuan, "A ṭul a nih chuan bench-ah a
ṭhu ang a, in aṭanga inkhel a en a ṭul pawhin in aṭangin a en mai ang," tiin captain Wayne Rooney chu player dang aia a duhsak bik loh thu a sawi.

Portuguese manager-in a
ṭawng liam puat lo tih lantirin Rooney chu December 26, 2015 (Boxing Day) hnua a vawi khat nan chawlh hahdamtir duh vang niin loin bench-ah ṭhuttir a ni. Rooney tel lohna United khel a mawi a, Spanish midfielder Mata-a'n England captain a thlak hneh hle.

Khawvel player manto ber Pogba-a'n goal a khung zanah midfield a thunun a, hetiang theihna nei midfielder hi United-in an hmuh lohna a rei tawh. Juventus midfielder hlui ball chip luh nalh tak chu Zlatan Ibrahimovic-a'n khung se Pogba hming a mawi lehzual ang. Second half-ah erawh French midfielder hi a bo a, United an chak chian tawh avangin Mourinho pawhin pawi a ti lo ang.

Minute sarih chauh a awm tawh tihin Wayne Rooney-a'n vei lam kila tlan Rashford a thlak a, England striker hi hun rei lote chhung a khelhna thar avang hian a hmalam hun hriat a awlsam phah lo.

Mou a lawm

Manchester United manager Jose Mourinho chuan, "Mahni muala kira champion lai hneh chu a nuam a ni. Season liam ta khan kan hneh thei lo a, tun season-ah erawh Leicester hi vawi hnih kan hneh der tawh. Kan chet danin awmzia a neih bakah a nung ṭha a, kan khelh dan a lungawi thlak hle a ni," tiin an result-a a lungawi thu a sawi.

Foxes an ral

Season liam ta khan Leceister-in champion turin tlarhnung an tiphui ṭha a, match 38-ah goal 36 chiah an chhuah. March leh April inkara match ruk an khelh aṭangin match ngaah 1-0 in hnehna an chang a, tun season-ah erawh midfieler taima N'Golo Kante an chan bawk avangin thilmak an thlen nawntir dawn lo tih a chiang chho ṭan der tawh.