Wenger-a nauten Chelsea an sawp

Arsenal-in minute 45 chhung lekin an mikhual Chelsea beiseina an hmet mit vek! Inrinni zan London Derby-ah Gunners hian Alexis Sanchez, Theo Walcott leh Mesut Ozil te goal hmangin Blues 3-0 in an sawp.

October 2011 hnua a vawi khat nan Premier League-ah Arsenal-in Blues an hneh a, Arsene Wenger-a hmaah Italian pa rorum Antonio Conte dawl zawrin a zawr.

Laipui a puak ring

Chile forward Alexis Sanchez-a'n central striker atana khel tlak lo tiha seltute chu goal hmangin a chhang a, Gary Cahill tihsual nang­chingin minute 11-na lekah goal hmahruai a khung - Chelsea an insiam ṭhat hmain Walcott-a'n goal khung belh chhunzawm zat bawk.

Barcelona aṭanga Gunners zawmtu Sanchez hian North London club tana a match 100-na a khel tling ta chiah a, goal 47 khung tawhin an match hmasa 100 aṭanga chhutin legend Thierry Henry (48) a tluk lohna chu goal khat chiah a ni.

Arsenal-in tun hmaa an game mawi khelh ṭhin ang kha an la thiam reng tih lantir zelin, minute 40-naah Sanchez leh Ozil ten Chelsea defender Cahill leh David Luiz te chiang taka an rep hnuah Germany international hian an goal thum nan ball kang lai a hlap lut - player ṭha leh thiam bikte tana tih chi a ni.

Alex Oxlade-Chamberlain nek chhuaktu Alex Iwobi a rintlak a, an goal hnihna luh theih nan Hector Bellerin nen an thawh hlawk hle. Kum 20-a upa Iwobi hian tharum a nei a, ball a thiam bawk. Barcelona aṭanga inzir chhuak Bellerin hi kum 21 chauha upa ni mah se defender ṭhain an neih tur ang chu a nei kim der tawh. Spain rawlthar hian Chelsea forward Pedro ball khalh lai tlan hela a chhuhsak theih avangin a club hlui Barca-in an hel leh tawh tiha an sawi hi thudik a ni ngei ang.

Chelsea an chuai

Antonio Conte-a'n captain John Terry la chhawr thei lo mah se Cahill, Luiz, Branislav Ivanovic leh Cesar Azpilicueta te hi khawvela defender ṭha zinga chhiar tel theih an ni. Italian manager lah Juventus a enkawl aṭanga Italy a kaihhruai thlengin tlarhnung ven thiam tia sawi mah se London club erawhin an match hnuhnung paliah goal an chhuah vek.

Arsenal chhuahsantu Cesc Fabregas-a'n Ozil ball sem lai a thlir a, Chelsea-in Arsenal goal zawna an pet hmasa ber chu minute 82-naah chauh niin substitute Michy Batshuayi ball pet chu Petr Cech-a'n a dan sak. Blues-a khelhna hmun chang pha lo veteran keeper Cech a la thiam reng a, Jose Mourinho hnuaia tlachhia Chelsea-in Conte hnuaiah an la insiamṭha thei lo.

Eng nge an sawi?

Arsenal manager Arsene Wen­ger chuan, "Player tinin an hna an tlin em em a, keeper Cech aṭanga forward Sanchez tleng khan an khelṭha vek. Mimal hming lamrik tur bik pawh ka hre lo. Football-ah chuan hmanlai a pawimawh ber lo a, tun huna kan result neih hi a pawimawh ber chu a ni zawk," tiin an khelh danah a lungawi hle.

Wenger hian league-ah Chel­sea a hmachhawn hnuhnung pakuaah hnehna a chang miah lo a, vawi ruk chu a chak lo zawkah ṭangin ṭum thun an inhnehtawk - tunah chuan he record duhawm lo tak hi a thai bo ta.

Chelsea manager Conte chuan, "Team ṭha tak anga kan lanna hi a thu mai a la ni a, khelmual chhungah a takin a la lang lo. Mimal tihsual sawi a ṭul lo a, a chhan chu kan chak emaw chak lo emaw team kan nih vang a ni. Minute khatna lek aṭang khan kan rilru a dik lo nghal tih a chiang a, insiamṭha turin kan thawkrim zual ang," tiin mimal tihsual a sawi lang duh lo.

Kum 47-a upa Conte hian October 2010 khan Siena a enkawl laiin Serie A-ah Empoli 3-0 in a hneh lo tawh a, tun ṭum hi khami hnua league-ah a chak loh chian ber ṭum a ni.

Hmabak

Arsenal hian Nilaini zan hian Champions League khel turin FC Basel an mikhual zui anga, hetih lai hian Chelsea erawhin kartawpa Hull City nena Premier League match bak khelh tur an nei lo thung.