Buaina pumpelh tum AFC Vs Chhinga Veng

Mizoram Premier League champion lai Aizawl FC-in match zawnin Chanmari FC leh Bethlehem VT FC an hneh lo a, zanin dar 7:00 hian match thum chhung chak hmel hmu tawh lo Chhinga Veng FC an hmachhawn ang.

Vawiin tlai dar 2:00-ah BVT-in table mawngphaha awm Dinthar FC an hmachawn dawn a, Lalbiaksanga Colney hoten point an hlawh chhuak a nih chuan Chanmari FC lehpelin table chung berah an awm leh dawn a ni.

Bright tel loin

Aizawl FC striker Bright Middleton Mends-a'n MPL-ah goal a la khung lo a, Ghanaian striker hian inhliam vangin Chhinga Veng a hmachhawn thei dawn lo. Hei bakah hian inhliam vangin William Lalnunfela hmalam hun a chiang lo a, match hnih chhung goal khung tawh lo AFC tan chanchin lawmawm a ni lo.

Aizawl FC assistant coach Lalruatdika chuan, "Tun hnaia kan result ṭhat loh avangin kan hnual phah lo. Match kan ngah avangin player ṭhenkhat kan dimdawi deuh tih loah chuan training pawh a ngai ang chiahin kan kalpui. Vawi hnih kan chak loh avangin kan chhe ta thut tihna a ni lo a, insiam-
ṭhatna tur kan nei tih erawh kan pha lo," tiin an la tlak chhiat loh thu a sawi.

Coach thar Chawnga

Lalremtluanga'n Chhinga Veng match kua a enkawlah vawi khat chiah hnehna a chanpui hnuin banna a thehlut a, MPL kaitharin coach atan Zo United (Reitlang FC) leh Chanmari West coach hlui Chawngthansanga an lalut. Hei chauh hi a ni lo, Chhinga Veng hi match hnuhnung pahnihah keeper vanga point an hloh avangin Kolasib Project Veng FC aṭangin Isak Vanlalpeka chu loan-in an lalut bawk.

Chhinga Veng coach thar Chawnga chuan, "Aizawl FC nen point thum kan mamawh ve ve a, a dawih zawkah ṭan kan tum lo. Ni khat chiah training kan neih bakah inhliam kan ngah avangin a harsa dawn tih ka hria, amaherawhchu result
ṭha lo tihtawp hi ka hna a ni," tiin an rawih chhan a hrechiang hle.

Kumin I Day Fotoball-ah club pahnih hi an intawng tawh a, hun tawp hma minute li chhunga goal hnih hmangin Aizawl FC-in Chhinga Veng FC 3-2 in an hneh.

BVT vs Dinthar

Lalbiaksanga Colney kaih-hruaina hnuaiah BVT-in MPL-ah hneh loh an la tawng lo, Armed Veng pa chuan, "Dinthar FC-in coach an thlak avangin khelh dan phung thar an zir a ṭul a, keini lamin inhliam kan neih loh bawk avangin chak turin kan dinhmun a ṭha zawk," tiin chak a inbeisei thu a sawi.

MPL5-ah Dinthar FC squad a chhah tawk lo a, damlo leh hliam vangin forward Michael Lalremruata, defender Lalremtluanga leh Vanneihtluanga te an inlan theih loh mel bawk. Dinthar coach thar Lalhlupuia chuan, "Kan tan nawr buan buan a rem dawn lo a, chak tumin kan khingpuite chak lohna laiah nawr kan tum ang," tiin fimkhur a ṭul thu a sawi.

I Day Football-ah Dinthar hian R. Lalnunmawia goal hmangin BVT an hneh a, MPL-ah team pahnih dinhmun inthlau deuh mah se chak zawk tur hriatthiam a har hle.