City Chak 10

Manchester City-in coach thar Pep Guardiola hnuaiah match 10 khel tawhin an la chak vek. Inrinni zan khan Liberty Stadium-ah Sergio Aguero goal hnih leh Raheem Sterling-a goal class tak hmangin Swansea 3-1 in an hneh a, Spanish forward Fernando Llorente chuan siphurh sut nan pui takin Swans tana a goal hmasa ber a volley lut.

Argentine forward Aguero chuan Wales-ah goal a khung ta a, City erawh EFC Cup-a an hneh tawh Swans hneh turin vanneihna an mamawh. Swansea defender Mike van der Hoorn chuan Kevin de Bruyne nghawk thluin penalty a chawi a, referee thutluknaah Francesco Guidolin a lawm lo.

Swans manager Guidolin chuan, "United Kingdom-a club ṭha ber laka ṭha taka kan khelh theih avangin ka lawm a, darkar khat chhung kha chu kan intluk tawk a ni. Penalty chungchangah referee thutlukna a nih avangin ka pawm a ngai a, ka hmuh dan chuan penalty tur a ni lo," tiin an vanduai thu a sawi.

Aguero-a'n penalty hi khungin hmun himah City hi a dah a, Pep Guardiola hoten hma an hruai nawn hnuah an hawi kir tawh lo a, chanchin lawmawm loh awmchhun chu inhliam vangin Kevin de Bruyne lakchhuah a ni.

Manchester City manager Pep Guardiola chuan, "Kan khelṭha a, kan ball inpek danah erawh a tawp khar ṭhat loh kan ngah. A vawi khat nan first half-ah 1-1 a ni a, team anga kan khelh avangin hnehna kan chang," tiin a sawi. City hian Spanish manager hnuaiah Premier League match ruk khelh tawhah goal khung hmasa zawkah an la ṭang ziah.

Chak loh nei lo a Everton kaltluang chu Bournemouth-in Junior Stanislas goal hmangin an titawp a, Tottenham Hotspur-in Son Heung-min goal hnih hmanga Middlesbrough 2-1 a hnehin table-ah pahnihnaah an invawrhchho bawk.

Stoke leh West Brom te 1-1 in an inhnehtawk a, Sunderland erawh Jermain Defoe goal hnih hmanga Crystal Palace lama an goal hnih khung an humhim zo lo. Palace-in Joe Ledley, James McArthur leh Christian Benteke te hmangin 3-2 in hnehna an chang a, Black Cats boss David Moyes chu supporter-ten an au el hial.