Zirtawpni zanah goal a lut lo
Chanmari West FC-in first half thunun chungin goal an khung thei lo a, second half-ah Zo United-in an chance ṭha neih an hlah ve bawk. Zirtawpni zan Mizoram Premier League Season 5 inkhelah goal a lut lo a, West Warrior midfielder K. Lalnunzama chu man of the match a thlan a ni.
West an vanduai
First half-ah Chanmari West-in inkhel an thunun a, ball possession pawh 53% neiin goal-ah vawi 10 zet pet mah se goal an khung thei lo. Ṭum dang ang bawkin West Warrior tan R. Laldanmawia leh Laldampuia te chu goal nawrna kawnga player pawimawh an ni a, goal hmaah an vannei lo.
Chanmari West tlarhmaah Lallianzama aiah Lalmuanzuala thlan a ni a, Lengpui tlangval Muanzuala hian second half-ah keeper chauh a hmachhawn hnuah Zo United keeper LK Hmangaihzuala (Mama) a pass.
Goal khung a har
MPL-a goal khung harsat zia tichiangtu chu Zo United an ni a, Vanlalrova hote hian MPL5-a match li an khelh tawhah goal an la khung lo. Zirtawpni zanah Zo United-in hun tawp lamah goal khungna chance an nei chauh! Chhanrinpianga ball pet kawh tak chu goal chungah a kal a, defender Lalnunpuia ball tauh ṭha tak chu West Warrior keeper Lalruatpuia'n (Mama) a dan bakah an chance neih ṭhat ber chu substitute Lalbiakkima 'first touch' ṭhat tawk loh vangin a goal lo bawk.
Eng nge an sawi?
Zo United coach Vanlalrova chuan, "MPL-a point hmuh harsat zia kan hriat avangin point khatah kan lungawi a, hun tawp lama kan chance neih dan en chuan chak kan phu zawkin ka hria. Goal khung aiin goal venhim kan ngai pawimawh hmasa zawk. Goal hi chu vanneih leh vanduaiah a innghat thui hle a ni," tiin goal an khung loh vanga hlauhthawnna a la neih loh thu a sawi.
Chanmari West coach HC Zarzoliana chuan, "Ka naute khelh danah ka lawm a, goal kan khung loh zo zai thlirin kei pawhin mak ka ti. Hun tawp lamah erawh chak kan duh si a, ka naute rilruah goal khung ringawt a lan tawh avangin tlarhnungah tihsual kan ngah phah a, ka hriatthiampui khawp mai," tiin inkhel a hmuh dan Vanglaini palai a hrilh.
West Warrior-in an duh-thu-sam result an hmuh loh vangin hnual deuh mah se K. Kawla Stand-a awm anmahni ṭantute khuang nen an zai leh tawh a, Zara hote tan lawmna tur a ni. Lily Veng cultural club-in football kalhmang an hre chho ṭan a, Zo United player-te tiphur thei turin thawm an nei ṭan bawk.
Tute nge inlan?
Chanmari West (4-1-4-1) : Lalruatpuia; Racy K. Lalremmawia, Toky Zomuanpuia, Lalawmpuia, Vanlalzuia Hnamte; K. Lalnunzama; R. Laldanmawia, Lalmuansanga, Lalbiakhlua (Ramengmawia 87'), Laldampuia (H. Lallianzama 67'); Lalmuanzuala.
Zo United (4-2-3-1) : L.K Hmangaihzuala; Vanlalruata, Malsawma Chhangte, Lalnunpuia Pachuau, R. Lalthantluanga; H. Malsawmtluanga, Laldinmawia; Lalṭhazuala (Lalbiakkima 67'), Chhanrinpianga, Laldinliana Varte; Jesse Laldinpuia.
ZoFooty Statistics
Chanmari West FC 0 - 0 Zo United
MoM : K. Lalnunzama, CWFC
50% Ball Possession 50%
18 Shot(s) 11
9 On Target 5
1 Yellow Card 1
0 Red Card 0
Powered By Rainbow Multibrand
Mobile Showroom