Barca chak niah Real an chelh

Lionel Messi tel loin Bar-celona chuan an mikhualna ramah Sporting Gijon chu 5-0 in an sawp a, hetih lai hian Real Madrid erawh Las Palmas nen 2-2 in an inhnehtawk thung.

Barca tan hian Luis Suarez (29'), Rafina (32'), Neymar (81', 88') leh Arda Turan (85') ten goal an khung a, hliam vangin Messi tel lo mah se Luis Enrique nauten goal khungah harsatna an nei lo. Catalan club hi Atletico Madrid nen 1-1 a an inhnehtawk hnuah an tho chiang hle.

Champions League-a Borus-sia Monchengladbach an khelh tur thlir lawkin Spanish coach Enrique-a'n midfielder Andres Iniesta leh Ivan Rakitic bakah defender Javier Mascherano leh Jordi Alba te a hahchawlhtir a; Arda Turan, Rafinha leh Andre Gomes te inkhel bul ṭantir an ni.

Enrique chuan, "Kan khingpui tur a zirin player ka thlang ṭhin a, hnehna chang thei tura ngaih player ka thlan ṭhin," tiin a naute a siksawi chhan a sawi.

La Liga champion lai Bar-ce--lona hian league match ruk khelh tawh aṭanga point 13 hmuin league table-ah pahnihna an ni a, hma hruaitu Real Madrid nen an inthlauhna chu point khat a ni mek.

Inkhel dangah Zinedine Zidane-a nau ten a zawnin hnehna an chang zo ta lo. Villarreal nen an inhnehtawk hnuah Las Palmas lakah an goal hum zo lo. Real hian Marco Asensio (33') leh Karim Benzema (67') te hmangin ṭum hnih hma hruai mah se Lal Palmas-in Dominguez (38') leh Sergio Araujo (85') te hmangin an siphurh an sut.

Real boss Zidane chuan, "Kan result avang hian minute 90 chhung chu inkhelah kan rilru 100% kan pek ṭul tih kan hriatchian lehzual phah ang. Kar laihawlah kan inkhel a, kartawpah inkhel lehin Champions League kan khel zui leh dawn bawk," tiin minute 77-naa Cristiano Ronaldo a thlak chhan a sawi lang tel.

Zidane chuan sawi chhun-zawmin, "Point thum hmu thei dinhmuna kan din hnuah kan chesual a, inhauh hun a nih loh avangin kan tihsual kan en nawn ang. League hmahruaitu kan la nih chhunzawm a, hei hi vawn nun zel kan tum tur a ni," tiin a sawi.