Awlsam taka Gaethje ngamtu Khabib a chawl

Khabib Nurmagomedov-a'n UFC lightweight title a kawl lai humhim turin Justin Gaethje lakah round hnih hmachhawn bak a mamawh lo a, awlsam taka hnehna a chan hnuah a chawlh thu a puang zui. 

UFC fighter ropui ber ang hiala mi tam takin an ngaih hian round hnihnaah 'triangle choke submission' hmangin Gaethje-a hneh a, "Hei hi fight ka hmachhawn hnuhnung ber a ni," a ti zui a, mixed martial arts ngainatute a barakhaih. 

July 3 khan Khabib-a pa Abdulmanap Nurmagomedov chu Covid-19 vangin a thi a, Abdulmanap hi a pa ni satliah loin a coach a ni tel bawk. 

Kum 32 mi Khabib chuan, "Ka pa tel lo chuan he hmunah hian ka lokal tawh lo ang," a ti a, Russian fighter hian MMA-a vawi 29 fight a hmachhawnah hnehna chang vek chungin a chawl.

Abu Dhabi-a fight neihah hian Gaethje chu Khabib tan harsatna thlen thei tura beisei a ni a, Khabib-a 'wrestling style' hmachhawn thiam ber pawl ni tura ngaih a ni. 

Mahse, beisei ang a ni lo - round khatna aṭangin Khabib hian fight a thunun nghal a, round hnihna a thlen meuh chuan Gaethje-a tlawm fel der.

UFC fighter ropui tak tak Dustin Poirier, Conor McGregor, Al Iaquinta leh Edson Barboza-te pawh Khabib hmaah hian an lo tlawm tawh a, Khabib hmaa tlawm tawh zingah Gaethje-a hming ziah kaiin a awm. 

Russian fighter Khabib hi kumin kumtir khan Tony Ferguson nen inhmachhawn tura tih a ni a, mahse Russia rama Covid-19 dan avangin a zin chhuak thei lo - Ferguson hian Khabib aiah Gaethje hmachhawnin a tlawm a, Khabib-a'n Gaethje-a lo hneh ve leh ta thung. 

Mi tam tak ngaihdanah chuan Khabib hian vawi 30 tal fight a hmachhawn an ring - 30-0 a chawlh hi Russian fighter duhthusam ni tura ngaih a ni. Mahse, vawi 29-naah a chawl ta zawk. 

Khabib chuan, "Ka pain min kalsan hnua fight ka hmachhawn leh hmasak ber a ni a, he fight chungchang sawi tura UFC-in min rawn biak khan ni thum chhung ngawt chu ka nu nen kan sawi dun a ni. 

"Ka pa tel loa fight ka hma-chhawn chu a phal lo a, mahse tun hi ka fight hnuhnung ber tur a nih thu tiam chungin he inelna hi ka hmachhawn a ni. Thu ka tiam tawh a, la let thei ka ni tawh lo," a ti. 

Khabib hian UFC a luhchilh hmain MMA professional match-ah vawi 16 hnehna a chang a, UFC-ah vawi 13 chak zuiin tlawm a nei lo. Russian fighter chuan, "UFC aṭang hian thil duh pakhat chiah ka nei. Khawvela pound-for-pound fighter number 1-a min dah ka beisei a, ka phu bawk a ni," a ti a, a record chhuang em em chungin a glove erawh a kalsan ta. 

Gaethje-a'n Khabib nena an inhnek tur atan a chhungte chu thlawhtheihnaa 'business class' hmangin UAE-ah a hruai a, ram pawna a chhungte an thlawhchhuah hmasa ber a ni. 

'The Eagle' tia hming lem an pek Khabib chuan, "Justin, pa ropui tak i ni tih ka hria. I lainate i enkawl dan pawh ka hria a, i chungchang thu hi ka hre hnem em em a ni. I hmangaihte chu engtiklai pawhin hnaih reng rawh - naktukah eng nge thleng dawn i hre si lo," a ti.

Justin hian kum li liam ta khan Khabib hi a lo pui tawh bawk - Russian fighter hi hetihlai hian reilo te chhunga Darrell Horcher hmachhawn tura tih a ni a, weight hloh a tumna lamah Justin hian a pui. 

Khabib chuan, "Justin, i chungah hian ka lawm takzet. Kum 2016-a ka rihna tihhniam ka mamawh lai khan nasa takin min pui a ni. Ka lawm e, unaupa," tiin a hneh tak fighter hi lawmthu a hrilh. 

UFC president Dana White chuan, "He fighter-in a paltlang zozai hi thlir ila, zanina a fight kan en thei hi kan vannei takzet a ni.

"Kar thum liam taah khan a ke phahah hliam a tuar a, damdawi inah a awm a ngai. A team-ten he thu hi min hrilh a, midang erawh an hrilh lo," tiin hliam damkawr chunga fight ṭhulh duh lo Khabib-a fak. 

Dana White chuan, "Khawvela mihring tawh khirh ber pawl a ni a, khawvela pound-for-pound fighter ṭha ber a ni. Khawvela fighter ropui ber huanga dah tlak a ni," a ti a, a fighter ṭha mi a thlah liam.

Khabib hian kum 31 mi Justin Gaethje-a hneh avang hian pound maktaduai sarih chuang a hlawh chhuakah ngaih a ni a, American fighter Gaethje hian pound maktaduai 2.5 vel a hlawhah ngaih a ni thung.

UFC fighter ropui ber hnenah ka duhsakna ka hlan a, i career duhawm tak kan thlir theih avang khan kan lawm takzet a ni, unaupa. 

- UFC legend Daniel Cormier 

Khabib, fight ṭha tak a ni e. I pa i channaah ka tawrhpui che a, zahna chibai ka buk che a ni. 

- Conor McGregor

Career duhawm tak a hman avangin Khabib hi duhsakna ka hlan a, a pa leh a fans maktaduai tam takte tan lawmna a thlen tih ka chiang a ni. A zinkawngah Pathianin awmpui zel rawh se. 

- Jon Jones,  UFC light heavyweight champion hlui