MSL chhunzawm thei rih lo

Mizoram Basketball Association-in MSL6 khelh chhunzawm dan leh MSL7 qualifying khelh dan tur an zawng a, November thla tira khelh turin ruahmanna an siam. Amaherawhchu Mizoram chhungah Covid-19 vei an pun chhoh leh tak avangin MBBA-in inelna an chhunzawm thei rih dawn lo.

Nimin khan MBBA chuan, "MSL6 khelh chhunzawm leh MSL7 Qualifying khelh tura ruahmanna thui tak kal tawh chu, COVID-19 No Tolerance Fortnight hman tur avanga UNLOCK 4.0 SOP tih danglam Clause F(5)-in tournament huaihawt a khap leh tak avangin tun dinhmunah chuan MSL6 khelh chhunzawm chu a remchang dawn ta rih lo tih kan inhriattir e," tiin thuchhuah an siam.

MSL6-ah hian semifinal leh relegation playoff khelh hmabak a awm. Semifinal-ah hian Chanmari Vikings leh Khatla TBL bakah Zarkawt BCA leh Tuikual South te an inkhel dawn a, Ramhlun SC leh Chawnpui BC ten relegation playoff an khel bawk ang.