Man United leh Chelsea an inhnehtawk

Old Trafford-ah Manchester United leh Chelsea te goal awm loin an inhnehtawk. 

Inkhel nung tak a ni lo a, Chelsea manager Frank Lampard-a'n inkhelh banah penalty hmu tur an nih thu a sawi - a sawi dik ang.

Champions League a awm chhunzawm dawn a, Manchester United hian October 28, Nilaini zanah RB Leipzig an mikhual dawn. Chelsea hi hemi zan vek hian Krasnodar hmachhawn turin Russia-ah an zin ang.

United tan Edinson Cavani a inlan ta a, goal thun lo mah se striker ṭha a nihzia a ball khawih vawi khatnaah a lantir nghal - a bak chu a langsar zui tawh lo.

United captain Harry Maguire chuan minute 40-naah Chelsea captain Cesar Azpilicueta kuah bet pahin ball a tauh chhuak a, referee Martin Atkinson-a'n a en liam. 

Ben Chilwell freekick pet hi replay aṭanga enin Maguire-a'n Azpilicueta a ven dan hi a dik tawk lo niin a lang a, United vanneihna erawh box chhung ni mah se VAR hmanga ennawn a ni lo!

Lampard chuan, "Penalty ngei tur a ni. In vawn hi chu a theih a, lua kuah beh erawh phal a ni lo. Referee tan chuan hmuh a har a ni thei a, VAR hmanga chinfel theih niin ka hria.

"VAR lam aṭangin referee kha monitor en tura hriattir tur a ni a, referee hian mual sir monitor hi chu en ngat se penalty a pe ngei ang," a ti - Blues captain Cesar Azpilicueta pawhin a pu ngaihdan hi a ṭawmpui.

Chelsea-in pound maktaduai 200 chuang an seng a, goal venhim kawngah hma an sawn. Blues hian defender Thiago Silva leh keeper Edouard Mendy-te an khelh kawptirin goal an la chhuah lo.

Brazilian defender Silva hian Cavani goal khung tur ṭha takin a dansak hman a, Chelsea-in point an hlawhchhuah theih nan keeper Mendy-a'n hun tawp dawn hnaiah Marcus Rashford-a ball pet ṭha takin a dang.

Chelsea hian Southampton leh West Brom lakah goal thum an chhuah a, Liverpool lakah goal hnih an chhuah. Lampard-a'n tlarhnung a rem thiam tawk loa ngaitu an tam a, amaherawhchu Blues hi match zawnin an clean sheet.

Tlarhma lam erawh a tlahniam thung. Timo Werner, Kai Havertz leh Christian Pulisic ten United tlarhnung tan harsatna an siam thei lo a, bench aṭanga lut Tammy Abraham, Mason Mount leh Hakim Ziyech te pawh eng an ni lo.

United tana bul ṭantu tur an inrinsiak a, hrem vangin Anthony Martial a khel thei lo a, player hluiten bul an ṭan a, hming langsar Paul Pogba bench-ah a ṭhu.

Season liam ta tawp lama tlarhnung rinrawl David de Gea, Aaron Wan-Bissaka, Victor Vindelof, Maguire leh Luke Shaw-te thlawp turin Scott Mc Tominay leh Fred-te an awm. Tlarhmaah Bruno Fernandes leh Marcus Rashford ten rin lawk angin bul an ṭan a, Juan Mata leh Daniel James-te an awm ve hlawl bawk.

Bench aṭangin Pogba, Edinson Cavani leh Mason Greenwood te an lut a, nipui transfer-a an player manto ber Donny van de Beek bench-ah a ṭhu tluan. Dutch midfielder hian khelmualah hun a la hmang tam lo a, a hun hman chhunah erawh a che chhe hran lo. Solskjaer-a player thlan dan aṭanga lang chu nipui transfer-ah Norwegian manager hian squad tih chakna tur a player duh zawng a lalut lo niin a lang.

Man United-in inkhel an thunun zawk a, Tottenham laka goal ruk an chhuah ṭum nena thlir phei chuan an tlarhnung a phui ta hle.

Chelsea tlarhma manto tak tak ten United tlarhnung an ti uai pha meuh lo a, chutih rualin Solskjaer-a hote hian goal an khung theih bik loh avangin point khat chiah an hlawh chhuak.

Uruguayan striker Cavani-a'n a luh aṭanga minute khat pawh tling loah chance a insiam nghal thei a, ball khawih tam lo mah se a ball chan chhunah a hlauhawm.

 French midfielder Pogba-a'n bench aṭanga a luh hnuah inkhel a tihmuhnawm sawt a, English forward Rashford ball pet ṭha tak keeper Mendy-a'n a dan avangin goal a lut ta lo.

Old Trafford-a point thum an hlawh chhuak lo chungin Solskjaer-a'n inkhelh banah hlim hmel a lantir thei a, a player thlan dan leh a chet dan aṭangin point khatah a lawmah a ngaih theih. 

Norwegian manager chuan, "Chelsea keeper-in a dang ṭha em em a, player ṭha tak tak an kawl bawk avangin goal khung a harsa. Mipui awm se inkhel result a danglam theih ka ring, inkhel entu awm tawh se ka ti hle. Season bul kan ṭan fuh loh hnuah kan insiamrem chho mek zel a ni," tiin hma an sawn zel thu a sawi.

United leh Chelsea-in Paris Saint-Germain player 'duh tawh loh' Cavani leh Silva an la duh viau mai hian club pahnih tun dinhmun a tilang chiang a - champion rinkai an ni lo ve ve!