Liverpool-in Sheffield an ngam

Premier League champion Liverpool-in Sheffield United lakah goal chhuah hmasa zet mah se goal hnihin an chhanglet a, hun a tawp meuh chuan 2-1 in hnehna an chang. 

Virgil van Dijk hmun ruaka centre back a chhawr Fabinho chuan minute 13-naah penalty a chawi a, VAR hmanga ennawn a nih hnuah mikhual team Sheffield tan Sander Berge chuan goal-ah a chantir. 

Liverpool tan Alisson lo kir mah se tlarhnungah Reds an talbuai a, Sheffield hian vawi 13 zet chu goal-ah shot an nei - Brazilian goalkeeper-in Ben Osborn shot ṭha zet a dan zarah 2-0 in an hnufual lo hram. 

Mahse, Reds an talbuai rei lo - minute 41-naah Roberto Firmino chuan si phurh sutna goal a khung a, minute 64-naah Diogo Jota chuan chakna goal a khung zui.

Mohamed Salah vanneih zan a ni lo a, Egyptian forward hi a goal khung chu VAR hmanga ennawn a nih hnuah offside vangin pawmsak a ni lo a, woodwork a tih per bawk. 

Liverpool boss Jurgen Klopp chuan, "Rim taka thawk chungin hnehna kan chang a, hetiang game hautak hi nuam ka ti ṭhin. Sheffield lakah chuan a awlsam ngai lo a, Chris Wilder hian hna a thawk ṭha hle a ni," tiin a sawi. 

Reds hian Thawh-lehni zan dar 1:30-ah Champions League group stage match an khel zui dawn a, Danish club ṭha FC Midtjylland an mikhual ang.