Burnley mualah Tottenham

Zanin dar 1:30 hian Burnley khelmual Rurf Moor-ah Tottenham Hotspur chu Premier League khel turin an lenglut dawn a, manager Jose Mourinho nauten point thum hmuh an beisei ngam ang.

EPL season kal laia team pali in chak ni hmel an la hmu lo, chak nei lo zingah Burnley hi an tel - Spurs erawhin point riat an nei tawh a, league title beisei ngam zinga mi an nih avangin zaninah pawh an ṭhat dan berin an khelin a rinawm.

Tottenham hian Harry Kane an nei a, an thiampuipa ni ṭhin Gareth Bale an nei leh tawh bawk - tlamuanpui tham an ni. Anni pahnih bakah hian Son Heung-min an la nei bawk, an pathum hian zaninah inkhel bul an ṭan rual a nih chuan Burnley tan dan an hautak khawp ang.

Season kal lai kan thlir chuan Kane leh Son hi an inkawp rem hle, a bik takin South Korea international hi a khel ṭha zual. Match riat aṭangin goal kua a khung bakah a ṭhiante khung tur vawi li a siamsak tawh bawk.

Spurs manager Mourinho chuan a forward duhlai hi club lian dangin an chuhpui mai a hlau a, hun rei zawk atan thlun beh a duh. Jose chuan, "Kei chauh ni loin manager dang pawhin an tana khel turin an duh vek ang. He hmunah hian hun rei tak cham se, ṭha takin khel se tih chu ka duh dan a ni. Hlawh tam leh zual zawk nei tura contract ziah a phu," tiin Son chungchang a sawi, a contract neih lai hi 2023 thleng daih a la ni.

Team ṭha pangngai tak ni ṭhin mah se Tottenham hian nomawi an chuh phak ngai meuh lo, Argentine manager Mauricio Pochettino kaihhruaina hnuaiah insiam lian viau mah se title erawh an hlawh chhuak thei chuang lo.

Beiseina sang tak nen Mourinho an lalut a, tunah chuan club lian dangte pawh elphak tura ngaih an ni. Portuguese manager hi - Porto, Chelsea, Inter Milan leh Real Madrid tana nomawi chawi tawh a ni a, a laka beiseina an nei sang hi a awm hle.

Beisei an neih thu sawiin Spurs defender Serge Aurier chuan, "West Ham lakah nuamsa taka point thum hmuh kan inrin laiin point hnih kan hloh leh, khatiang kha chu a thlen nawn tawh loh kan beisei," tiin nomawi chawi tur chuan fimkhur a pawimawh thu a sawi.

Tottenham hian Hammers laka goal thum an khung hnuah Europa League lamah pawh goal thum bawk an khung, zanina an hmachhawn tur hi league match li aṭanga goal riat chhuah an nih avangin Mourinho nauten an khung hnem a nih pawhin a mak lo ang.