International match-a MC tur Mizo pa

India-in March 19, Nilaini zan dar 7:00 hian friendly match-ah Maldives a hmachhawn dawn a, Mizo pa Malsawma Renthlei (Asawma) chuan match commissioner hna a thawk ang.

Inkhel hi Jawaharlal Nehru Stadium (Polo Ground), Shillong-ah khelh a ni dawn a, Meghalaya-a international match khelh hmasak ber tur a ni.

Chanmari pa Asawma hian India ram football-ah tawnhriat ṭha tak a nei tawh a, international match-a match commissioner ni thei tur khawpin sulhnu a nei ṭha tawh.

Asawma hian inelna lian Indian Super League, I League, Santosh Trophy bakah Durand Cup final thlengin MC hna hi a thawk tawh a, MFA tan pawh a tawnhriat hi a hlu. Tunah hian MFA technical committee-ah member a ni mek.