French Open champion khung hrang

French Open hmeichhe singles champion Iga Swiatek chu coronavirus kai nen an inhnimhnaih avangin khung hran a ngai, natna nei lo mah se an ram sorkar inkaihhruaina dan a zawm a ngai a ni.

Zirtawpni khan Swiatek hian Poland president Andrzej Duda a hmu a, a hnuah an ram hruaitu hi Covid-19 a kai tih hmuhchhuah a ni a, tun hnaia a mi hmuh leh awmpuite chu khung hran an ni dawn.

Kum 19 mi Swiatek chuan, "Kei leh ka team zinga mi chu natna nei leh harsatna nei kan awm lo, mahse sorkarin kalphung a neih chu kan zawm a ngai, endikna pawh ṭha takin kan nei chhunzawm reng a ni," tiin a sawi.

Poland tennis player zingah chuan Swiatek hi kum 81 hnua French Open final khel leh thei hmasa ber a ni a, Monica Seles (1992) hnu lamah Roland Garros a title la thei naupang ber dinhmun a luah bawk.

Tun season chhunga Grand Slam khelh theih - Australian Open, US Open leh French Open an khel zo tawh a, hri a kai a nih pawhin Swiatek hian inelna lian hmachhawn theih loh tur a nei lo ang.