Fulham hneh loin Man United an tla

FA Cup quarterfinal thleng zo loin Manchester United an tla! Ruben Amorim-a naute hi Fulham nen 1-1 in an inhnehtawk a, penalty shootout neih niin London club hi 4-3 in an chak zawk a ni.

Pathianni zan Old Trafford-a inkhelah, chawlhlawk hma chiahin mikhual Fulham tan Calvin Bassey chuan a khung a, captain Bruno Fernandes chuan a sut thung, extra time an khelh zawh thlengin goal dang a lut zui tawh lo.

Fulham goalkeeper Bernd Leno chu a changtupa a ni - German si ban nghaktu hian Victor Lindelof leh Joshua Zirkzee te penalty pet a dansak a, Cottagers lam tana pettuten an khung vek thung.

Goal khat ve ve

An inveng tawh a, goal kan hmu mai lo - chawlhlawk hma chiahin Fulham lamin corner an hmu. Rodrigo Muniz-a ball tauh chu leiah tlain a sawt kang leh chu Calvin Bassey-a'n hnai tak aṭangin a tauh lut, keeper Andre Onana tana ban phak loha kilah a ni.

Amorim leh a naute an che hleithei lo, tun hnaia United captain hlui Roy Keane-a'n a sawisel Fernandes a inlar. Portuguese midfielder hian Diogo Dalot-a ball pek chu laklawh nei miah loin goal kilah a pet lut, a lir a nih avangin Leno tan dan a harsa zual.

Team pahnih ten penalty ngai kher loa chak theihna remchang an nei ve ve. Fulham midfielder Emile Smith Rowe-a khung ngei tur nia lang chu Onana chuan a lo dansak. Kum 17 mi, substitute Chido Obi pawhin remchang nei mah se Leno a paltlang lo.

Fulham manager Marco Silva chuan, "Tournament ṭan tirh aṭang khan kan ngai thutak em em a, kan tan chuan inelna lian leh hlu tak a ni. Team puitling tak kan ni tih kan lantir, FA Cup chauh ni loin Premier League-ah pawh chu chu kan hmu," a ti.

Kum 1975 daih tawh khan Fulham hian FA Cup final an lo lut tawh, a hnuah an la lut leh lo. Kuminah hian final luh leh an beisei mek a, quarterfinal-ah chuan Crystal Palace an tum dawn; London Derby kan hmu dawn, a boruak a sang khawp ang.

Amorim leh buaina

Manchester United thuneitu lamin an buaina chinfel an tum a, manager Erik ten Hag an ban - a hmun ruakah Ruben Amorim an la lut a, mahse an buaina chu chinfel mai theih a ni chuang lo a, a zual zel emaw tih mai tur a ni zawk.

Player ṭhenkhat an lungawi lo a, loan hmangin Marcus Rashford leh Antony te chhuahtir an ni. Khelmual pawn lam aṭangin Man United player hlui ten Amorim leh a naute chet dan an lo sawi ve reng bawk, boruak ṭha an nei thei meuh lo.

Premier League hmahruaitu Liverpool an phak lohna chu point 34 tehmeuh a ni a, hei hi Man United point hmuh (33) aiin a tam zawk. Tun season atana an beisei awmchhun chu Europa League chauh a ni tawh, chu pawh thil awlsam a ni lo ang.

Tun hnai khan United tana goal khung tam ber Wayne Rooney chuan, tun dinhmuna Man United chet dan ngaihtuah chuan an tan EPL champion an tumna chu thil âtthlak mai nia a ngaih thu a sawi hial, a club hlui chu insiamṭha mai turah a ngai lem lo.

Amorim chuan, "Premier League champion nih chu kan tum ngei a lawm, tuna kan dinhmunah a harsa tih kan hria, season tharah rinkai ber kan ni ang tih pawh sawi a rem lo, mahse tum chu kan nei tur a ni, kum 40 mi ni chungin Man United ka enkawl, ka mawl lem lo a ni ang," a ti.