A chung berah goal li khungtu Barca

Barcelona chuan La Liga table chung ber an luah leh ta - Pathianni zan khan an mikhual Real Sociedad chu 4-0 ngawtin an sawp a, minute 17-naa Sociedad centre back Aritz Elustondo hnawhchhuah a ni chu an chhawr tiin a sawi theih.

Catalan club tan Gerard Martín, Marc Casadó, Ronald Araújo leh Robert Lewandowski ten goal khat ṭheuh an khung a, hun tawp thlenga goal dang lut loin Barcelona an chak chiang.

Hansi Flick enkawl Barca hian match 26 khelh tawhah point 57 hmuin table chung ber an luah a, pahnihna Atletico Madrid aiin point khat chauhin an sang thung - kartawp inkhela chak lo Real Madrid chu pathumnaah an tla thla.

A hun takah

Barca-in Real chetsual thu hre sain Sociedad an mikhual a, Catalan club tan hmahruaitu nih leh theihna kawng zau takin a inhawng. Mahse, Sociedad hian November khan Barca hi an lo hneh tawh a, fans tam takin an hlauthawng.

Thawnthu erawh a danglam ta - vanneihnain Barca lam a ṭang tel a, Sociedad defender Aritz Elustondo chuan goal khung thei dinhmuna ding Dani Olmo chu titluin red card a chawi a, thutlukna dik a ni.

Minute riat hnu lawkah Barca hian a tam zawk nihna an chhawr nghal a, Olmo siamsak chu Gerard Martín chuan goal-ah a chantir. Barca au thawm pawh a reh hman lo. Minute li hnu lawkah Olmo bawkin Casadao tan a siamsak ve leh a, chawlhlawk hmain 2-0 a ni der.

A chiang hma

Barca-in an mualah an khel a, player pakhatin an tam zawk a, si hnihin hma an hruai bawk - chak tur a chiang hma tiin a sawi theih a, mahse, Catalan club hian hetah hian an la duhtawk mai lo.

Pedri-a'n woodwork a tihper hnu lawkah Raphinha corner pet aṭanga ball kal chu Araujo chuan a tauh lut a, Uruguayan defender hian a hnu lawkah goal-ah a shot - hei hi Lewandowski chuan lo khawih zeuhin, Sociedad keeper Alex Remiro chu ball kal dan a chhut sualtir a, an goal lina a khung.

Kum 36 mi ni tawh mah se, Lewy hian tun season inelna hrang hrangah match 37 khelin goal 34 ngawt a khung tling leh der tawh a, assist vawi thum a nei bawk - Pathianni zan inkhelah Lamine Yamal-a'n goal khung lo mah se, a hmuhnawm lehpek viau bawk.