East Bengal beiseina a tawp

Indian Super League-ah East Bengal tan beisei tur a awm tawh lo - Pathianni zan khan an mikhual Bengaluru chu 1-1 in an inhnehtawkpui a, table-ah parukna aia sanga an awm theih tawh loh avangin beisei tur an nei tawh lo.

East Bengal hian Raphael Messi Bouli hmangin minute 11-naah goal hmahruai an khung a, an phur hle. Mahse, first half hun pek belhah Kolkata club striker chhuanvawr Dimitrios Diamantakos chu hnawhchhuah a ni a, Blues dinhmun a ṭha sawt.

Player tam zawka khel chungin, Bengaluru-in si phurh sut erawh an harsat a, point khat hlu tak hmu turin hun pek belh an nghah thlen a ngai a, penalty an mamawh tel bawk.

East Bengal defender Nishu Kumar chuan Blues striker Sunil Chhetri a ven luatah a kutin ball a tawk fuh a, penalty a chawi. India captain hlui Chhetri hian harsatna awm miah loin goal-ah a chantir a, Bengaluru an chak daih.

Kum 40 mi ni tawh mah se, Chhetri a la chul lo hle. India captain hlui hian tun season-ah league match 23 khel tawhin goal 12 a khung tling tawh a, assist vawi hnih a nei tel bawk.

Bengaluru tan Lalremtluanga Fanai chuan inkhel bul ṭanin, East Bengal tan David Lalhlansanga chu bench aṭangin a lut bawk.

ISL-ah hian a sang pahnihin semifinal lutin, pathumna aṭanga paruknaten playoff khelin, semifinal luh an inchuh leh ang.