Chennai Super Kings beisei a chau

Zirtawpni zan Indian Premier League-ah Mumbai Indians-in wicket 10-in Chennai Super Kings an sawp a, MS Dhoni kaihhruai Chennai-in point ruk chauh an la hmuh avangin a sang pali zinga tel a harsa tawh ang.

Sharjah Cricket Stadium-ah Mumbai-in vawm hmasak an thlang a, Chennai tan Sam Curran-a'n run 52 siam ve bawk mah se Mumbai bowler Trent Boult an ngam lo. Boult hian run 18 chiah pein wicket li a la a, Chennai-in run 114/9 chauh an siam.

Mumbai tan Ishan Kishan-a'n thi loin run 68 a siam a, over 12.2 lekah target an umpha. Inrinni inkhelah Kolkata Knight Riders-in (194/6) run 59-in Delhi Capitals (135/9) an hneh a, Kings XI Punjab-in run 126/7 lek an siam chungin run 12-in Sunrisers Hyderabad (114) an hneh bawk.

Zanin dar 7:30 hian Kolkata Knight Riders leh Kings XI Punjab te an inkhel dawn a, palina leh panganaa awm te an nih avangin inkhel pawimawh a ni.