Lukaku awmna Inter an sang zel

Romelu Lukaku chuan goal khung a bansan thei lo, a khung belh zel. Lukaku awmna Inter Milan chuan Inrinni zan khan Genoa 2-0 in an luhchhuah a, point 10 hmuin table-ah pathumna dinhmun an luah.

Inkhel chawhma lamah Inter lamin beisei an phak bik lo, 2019 March thla hnua a vawi khat nan first half chhungin goal zawnah an pet miah lo. Mahse, second half-ah boruak danglamin Inter lamin goal hnih an khung.

Lukaku-a'n substitute Nicolo Barella nen mawi taka ball an inpek hnuah goal hmahruai a khung, Antonio Conte naute lamin an la duh tawk lo - Andrea Ranocchia corner pet chu Danilo D'Ambrosio-a'n a tauh lut bawk.

Belgium international Lukaku hian ram leh club tana a match hnuhnung 13-ah goal 15 zet a khung thei, tun season bik chhiar chuan match kua a khelh aṭangin goal 10 a khung; a khung belh zel dawn ni pawhin a lang.

Inter manager Conte chuan, "A tir aṭangin inkhel kan thunun a, goal khung tam tawk lo mah ila kan khelh dan kha a lungawi thlak hle. Goal hnih chauh kan khung avangin kan khel ropui tawk lo emaw ti tawk an awm mai thei, a tak ramah erawh kan khel ṭha takzet," a ti.

Inrinni zan inkhel dangah Atalanta chu an mikhual Sampdoria lakah 3-1 in an tlawm, beisei anga season bul ṭan fuh lo Lazio erawh an mikhual Bologna lakah 2-1 in an chak ve thung.