Paris St-Germain an chak chiang

Paris St-Germain chuan Champions League lama beisei an phak lohna chu an insiamṭha nghal a, an mikhual Dijon chu 4-0 ngawta sawpin French Ligue 1 table hmahruaitu an ni leh ta.

Inrinni zan Paris khawpuia inkhelah PSG tan hian Moise Kean chuan chawlhlawk hmain goal hnih a khung, Italian striker goal khung hi Mitchel Bakker leh Neymar te siamsak niin a team chu dinhmun duhawm takah a dah.

Minute 73-naah Kean hi hliam vanga thlak a ngai, bench aṭangin Kylian Mbappe a rawn lut thung. French rawlthar hian hun tawp hma minute 10 chauh a awm tawh tihin goal hnih a rawn khung belh, a goal khung pahnihah hian Neymar a thawh hlawk hle.

PSG hian season bul an ṭan fuh lo, an match hmasa pahnihah an tlawm nghal. Mahse tunah chuan a zawnin league match rukah hnehna an chang leh ta a, point 18 hmuin a chung berah an awm - point 17 neia pahnihna dinhmun luahtu Lille aiin match khatin an khel hnem thung.

French champion PSG manager Thomas Tuchel chuan, "Football-ah chuan khelh fuh leh fuh vak loh ni a awm thei, tun ṭuma ka naute khelh dan khan min tilawm hle. Inkhel thunun chungin kan duh ang zat goal kan khung thei.

"Hri leng vangin boruak hriat ngai loh a thleng thut thut a, chutiang kara point thum hmuh theih hi chu a hlu takzet," tiin a sawi. PSG hian kar hmasa khan UCL group stage-ah Manchester United an ngam lo, Nilaini zanah Istanbul Basaksehir an lenchilh leh ang.

Inrinni zan French Ligue 1 inkhel dangah Marseille chuan an mikhualna ramah Lorient chu defender Leonardo Balerdi goal khat hmangin 1-0 in an hneh a, Andre Villas-Boas naute hian point 15 hmuin palina dinhmun an luah.