Montreal Impact striker thar Didier Drogba

Chelsea striker hlui Didier Drogba chu Major League Soccer club Montreal Impact player thar a ni dawn ta. MLS club-ah hian thla 18 chhung a cham ang.

Kum 37-a upa striker hi season hman zawh a nih rual khan Chelsea-in a duh lam hawi thei turin an chhuah zalen a, MLS club pahnih Chicago Fire leh Montreal Impact ten thawm an nei nghal.

MLS club pahnihin pawisa an thehchhuak hnem a, Ivorian striker hian a ṭawng thiamsa French ṭawng an hman nasatna hmun Montreal khawpui lama kal hi a thlang ta zawk a ni.

Montreal Impact an phur

Khawvela striker hlauhawm ber pawl ni ṭhin an lakluh theih avangin Montreal president Joey Saputo a lawm a, Canadian sumdawng hausa chuan, "Vawiin hi kan club chanchina ni ropui leh hriatreng tlak a ni. Impact-a Drogba kan la lut thei hi kan tan chuan chawimawina ropui tak a ni," a ti.

Saputo chuan Drogba an la lut chu an hlawkpui tur thu sawiin, "Kan titi dun hmasak ber aṭang khan Drogba hian Montreal tana khelh hi a duh takzet a ni tih ka hre thei nghal a, kan hnena a lo kal avangin kawng engkimah kan hlawkpui ang tih ka chiang a ni," tiin a phur hle.

Hlawh hnem tur Drogba

Ivory Coast tan vawi 105 a inlana goal 65 khungtu striker hian a hlawh hnem dawn hle. A hlawh tur zat hi chiang taka tarlan ni lo mah se khawthlang media tam zawk chuan kum khata dollar maktaduai 3 chuang hlawh tur angin an ziak.

MLS club-te hi player-te hlawh zata an insen tur zat bithliah sak an ni a, mahse player langsar an lakluh dawn erawh chuan 'designated player' an ti a, hengho hian an hlawh hnem thei bik.

Montreal Impact pawh hian Drogba hi 'designated player' angin an la lut a ni.

ISL leh Drogba

Kar hmasa lawk khan Indian Super League club Atletico De Kolkata chuan Drogba hi lakluh tumin an bia a, thla thum chhung leka dollar maktaduai khat hlawh tir leh a awmna senso zawng zawng tumsak an inhuam.

Drogba hian kum 2012-a Chelsea a chhuahsan hmasak zawk khan sum tamna Chinese Super League club Shanghai Shenhua pan a lo thlang tawh a, ISL club pawh hi a rawn zawm mai ringtu an awm nual hman. Mahse, a football hun hnuhnung lamah Drogba hian a tlangnel theih a inrinna Montreal Impact pan a thlang ta zawk a ni.

Khawvel ngaihven MLS

Kum 2007 khan England captain hlui David Beckham chuan LA Galaxy a pan a, khawvelin MLS lam a hawi ṭan. Hemi hnu hian Europe-a player vantlang ṭhenkhatin MLS lam pan an intihhmuh a, kum 2010 khan Arsenal legend Thierry Henry te hialin MLS hi an pan.

Kum 2015 a inherchhuah meuh chuan MLS-ah khawvel huapa langsar player an tam tawh hle. LA Galaxy-in Liverpool captain hlui Steven Gerrard an kawl a, New York City FC-in Chelsea legend Frank Lampard, Italian player ropui Andrea Pirlo leh Barcelona striker hlui David Villa te ho an kawl a, Orlando City-a an captain chu Brazilian legend Kaka a ni bawk. Tunah Drogba-a'n Montreal Impact a pan ve leh ta bawk nen sum tamna MLS hian khawvel ngaihven a hlawh dawn chauh niin a lang.