Inter tluk loh Real

International Cham­pions Cup-ah Jese leh James Rodriguez te'n goal ropui an khung a, Raphael Varane-a goal khat khung nen Real Madrid-in season thar atana inpuahchahna inkhelah Inter Milan 3-0 in an hneh.

Tianhe Stadium, China-ah Rafa Benitez-a'n starting eleven-ah Sergio Ramos, Cristiano Ronaldo leh Gareth Bale te a luhtir a, inkhelh ṭan aṭanga a tawp thlengin inkhel an thunun.

Ronaldo leh Bale ten inkhel nung tak lantir mah se Inter keeper Samir Handanovic an patlang lo a, Inter tan midfielder Hernanes a langsar thung.

Minute 29-naah Real-in an phu ang ngeiin Jese hmangin an khung. Second half tir lamah Inter che ṭha mah se Va­rane-a goal khung hmangin Real-in dinhmun an sawhnghet a,Minute 88-naah Jese-a'n freekick aṭangin goal mawi tak a khung leh bawk.

Real tan hian thar Kiko Casilla chu second half aṭangin a inlan a, khel chhe lo mah se Real keeper tur meuh atan chuan a la iai awm deuh.

Spanish club lian hian China-ah match ruk an khel tawh a, an la chak vek.

Real manager Benitez chuan, "Kan khel ṭha a, kan thawkrim a, goal kan khung a, goal kan chhuah lo, kan khelṭhaah ka ngai," tiin an khelh dana a lungawi thu a sawi.

Real hian Rafa Beni­tez hnuaia an match hmasa berah AS Roma penalty hmangin hneh lo mah se Manchester City leh Inter Milan an hneh leh tawh avangin Liverpool manager hlui hian a club tharah bul a ṭan chhe lo.