Man City an chak chiang

Manchester City-in Australia an tlawh hnu­ah Thawhṭanni khan Vietnam khawpui Hanoi-ah Vietnam national team chu 8-1 in an sawp.

My Dinh National Sta­­dium-a inkhelah hian minute 10-na lekah Aleksander Kolarov-a'n freekick aṭangin a khung a, Raheem Sterling-a'n goal hnih a khung inkarah David Silva-a'n goal khat a khung a, first half-ah 4-0 in Manchester City-in hma an hruai.

Second half-ah City-in harsatna nei loin goal li dang an khung leh a, Kolorov leh Silva ten goal hnihna an khung bakah Marcos Lopes leh Jose Pozo ten goal khat ve ve an khung bawk.

Vietnam hian injury time-ah Van Quyet-a hmangin goal khat an khung ve hram. City 8-1 in an chak a, Inrinni khian Stuttgart an tlawh leh ang.

Pound maktaduai 49 man Sterling-a'n a club thar tan bul a ṭan chhe lo a, friendly match thum a khelh tawhah goal thum a khung tawh. Vietnam an hmachhawn ṭum hian pound maktaduai li man Patrick Roberts chu bench aṭangin a lut bawk.

My Dinh National Sta­dium hi mipui 40,000 lenna a ni a, 20,000 chauh an pungkhawm. Inkhel entu tlem chhan hi City an ngaihsan tawk loh vang ni loin inkhel en man £50 (Rs 4986.62) hi Vietnamese mi nawlpui thla hnih hlawh vel a nih vang a ni.