South Africa Tour hmain coach thar kan nei ang - BCCI secretary

India rama cricket thuneitu sang ber Board of Control for Cricket in India (BCCI) secretary Anurag Thakur chuan October thlaa South Africa an hmachhawn hmaa coach thar tihchian an tum thu a sawi.

ICC World Cup 2015 zawh khan India-in an coach Duncan Fletcher an chawlhtir a, coach thar ruat loin India team director Ravi Shastri chu coach lailawka ruat a ni.

Thakur chuan, "Mi pa­thum committee-ah Sachin Tendulkar, Sourav Ganguly leh VVS Laxman te an awm a, anni hian coach thar an ruat hunah tihchian a ni ang. Chumi hma chuan tuna kan kal dan hian kan la kal rih ang. South Africa-a tour kan neih hma ngeia ruat erawh kan tum a ni," tiin a sawi.

BCCI secretary Thakur chuan Indian Premier League buaina chungchang sawi langin, "IPL tana ṭha ber tur kan ngaihtuah mek a, sawi vek a rem rih lo. Club pahnih suspend aiawh tur hi lilamna hmangin kan zawng tih kan la sawi lo," tiin Chennai Super Kings leh Rajasthan Royals thlak dan tihchian a la nih loh thu a sawi.