El Clasico a hmuhnawm - Real an vannei?

Inrinni zan El Clasico inkhelah Real Madrid-in 3-1 in Barcelona an hneh a, Nou Camp-ah team chungnung zawk an ni. 

Scoreline aṭanga teh chuan Real hi vannei anga sawi a rem lo a, inkhel pumpui leh referee thutlukna ṭhenkhat thlir erawhin goal hi inkhel hrilhfiahna a tling tawk lo tih fan-ten an pawm ang. 

Real tan Federico Valverde, Sergio Ramos (penalty) leh Luka Modric-ten goal khat ṭheuh an khung a, Barcelona tana Ansu Fati goal khungin awmzia a nei lo.

 

Barcelona tan Lionel Messi-a'n beisei a phak lo chhunzawm zel a, Argentine forward hian tun season-ah penalty aṭanga goal hnih a khung bak goal dang a khung thei lo chhunzawm zel. 

Spanish club pahnihin tun hnaiah beisei an phak lo a, El Clasico meuh pawhin ṭum dang angin boruak a nei lo - mahse, 'El Clasico' chu 'El Clasico' a lo la ni reng a, minute ngana lek aṭangin goal kan hmu ṭan. 

Real striker Karim Benzema chuan Valverde tana duhthusamin ball a pe a, Uruguayan midfielder hian ṭha zeta a tlan luhpui hnuah Barca keeper Neto tana dan rual lohin goal-ah a chantir. 

Mahse, Barca an nguai rei lo - minute thum a liam hman awrh a, an si phurh an sut. Jordi Alba cross aṭanga ball kal chu Fati chuan ṭha zetin goal-ah a lo chantir a, minute 10 pawh a tlin hmain goal hnih kan hmu der. 

Kum 17 mi Fati hi El Clasico-a goal khung thei naupang ber a ni nghal a, tun season match ruk a khelh aṭanga goal nga khungin assist vawi hnih a nei bawk. 

First half-ah goal dang a lut lo a, second half-ah Real goal hnihna hmu turin penalty a ngai - Clement Lenglet-a'n Ramos a pawt a, Real captain hi Lenglet-a'n a pawh lohna lamah a tlu.

Referee Juan Martínez-a'n VAR a rawn zui a, rin loh takin penalty a pe - defender goal khung thiam Ramos tan goal-a chantir turin harsatna a awm lo. 

Barcelona boss Ronald Koeman chuan inkhelh zawhah, "Penalty area-ah chuan an inpawt fo a, Ramos kha a foul hmasa zawk hialin ka hria. An inpawt ngei a, mahse Ramos kha khati taka tlu tur pawh a ni lo," tiin referee thutlukna a sawisel.

Spanish defender a ngawi duh bik lo. Real captain chuan, "Penalty chiang tak a ni a, khatiang ang thil chiang lutuka referee kan sawisel hi a ṭha ka ti lo," tiin a sawi ve thung. 

La Liga-a Cadiz an ngam loh hnuin Champions League-ah Shakhtar Donetsk lakah Real an tlawm zui a, El Clasico-ah beiseina a sang lo - mahse goal thum an khung tlat. 

Minute 90-na a ni a, Luka Modric chuan a duhthala Barca keeper Neto a bum kual hnuin an goal thumna a khung a, Croatian midfielder 'class' pholangtu goal a ni. 

Real-in hnehna an chang a, 2012-13 hnua a vawi khat nan El Clasico-ah a zawnin match thum an tlawm ta lo. Madrid boss Zinedine Zidane chuan, "Ka player-te ka lawmpui a, hei hi team hnehna a ni. 

"Tun hnaiah sawiselna kan tawk nasa a, hetiang boruak karah hian hahdam taka awma, inlungrual taka inkhelh kan mamawh - vawiina kan tih ang chiah khan," a ti a, a hlim hle. 

Messi-a'n goal khung lo mah se goal khungna remchang erawh a nei a, chiang zeta hmun leh hmuna Ramos-a bum hnua Thibaut Courtois-a'n a lo dansakte chu uiawm a tling a, Raphael Varane-a'n a tih tluk avanga penalty a hlawh ngei tur nia lang chu a hlawh chhuak lo bawk. 

French defender Varane hi a vannei a, handball nia ngaihah referee-in VAR a rawn chuang lo. Barca boss Koeman chuan, "VAR hi kei chuan ka hrethiam ve lo a, Barca ṭhat loh nana thutlukna siam nan an hmang ber niin a lang," a ti!

Koeman hnuaiah Barca-in match nga khelin point sarih chiah an la nei a, Dutch coach hian zawhna a hmachhawn a ngai ṭan - Philippe Coutinho-a'n a khel ṭha lo chunga minute 90-a hmang tluan chu thil mak a tling a, minute 80 hnu lamah Antoine Griezmann leh Ousmane Dembele a luhtir chauh bawk. 

Hetihrual hian American zinga El Clasico khel hmasa ber rawlthar right back Sergino Dest, Spanish attacking midfielder Pedri leh Fati-te kha kum 19 hnuai lam vek an ni a, Barca tan hmuh nuam an tling ang.