Champion theih ka la inbeisei - Vettel
Ferrari driver duhlai Sebastian Vettel chuan Formula 1 inelnaah Mercedes car te lehpelin champion theih ala inrin thu leh infiamnaah chuan thil thleng thei lo tak tak a awm loa a hriat thu a sawi.
Pathiannia tlan zawh tak Hungarian Grand Prix-ah khan Vettel hi pakhatna niin tun seasona vawi hnih hnehna a channa chiah a ni. Driver championship-a hmahruaitu Mercedes driver Lewis Hamilton nen point 42 in an inthlau mek.
Ferrari team hian season bul an ṭan chhe lem lo a, intlansiak vawi hnihna Malaysian Grand Prix-ah Vettel chu pahnihna a nih bakah intlansiak vawi lina Bahrain Grand Prix-ah Ferrari driver pakhat zawk Kimi Raikkonen chu pahnihna niin Mercedes driver pahnih Hamilton leh a teammate Nico Rosberg te inkarah a thleng.
Silverstone tlankawnga an tlan British Grand Prix-ah khan Vettel hi pakhatna ni ngei tura a lan laiin beisei loh takin Mercedes car pahnih hnungah thlengin pathumna a ni. Mahse kar thum a ral hnuah Hungaroring tlankawngah erawh ropui takin hnehna a rawn chang.
Ferrari technical director James Allison chuan, "Hnehna kan chang leh ta hi kan team tan a lawmawm takzet. Tunah chuan nipui chawlh kar hnih chhung kan neih dawn avangin inenlawkna hun kan neih belh dawn a, season chawhnu lamah chuan ṭha lehzualin kan lo kir leh ang. Inelna hi ala zo lo a, kan ṭan dawn chauh," tiin beiseina ala nei sang hle.
Tun season aṭanga Ferrari car khalhtu Vettel chuan, "Tunah hian hmabak tam tak kan la nei. Inelnaa hnehna changtu ni tur chuan tihtakzet a beih a ngai ṭhin. Intlansiak vawi kua kan la hmachhawn dawn avangin inlehthalna hun ala awm a, kan la beidawng thiang lo. Tuna hmahruaitu Mercedes hi pakhatna an ni ngei dawn tihna ala ni chuang lo," tiin Hamilton leh Rosberg te chu lehpelh ala tum ruh hle.
German driver kum 28-a upa Vettel hi Red Bull car khalh chungin kum 2010, 2011, 2012, 2013 te khan world champion alo ni tawh a ni.