2024 Olympic thlen tum Boston inhnukdawk
US Olympic Committee (USOC) chu 2024 Olympic leh Paralympic Games Boston khawpuia thlen an tumna aṭangin an in hnukdawk.
Boston-in infiamna kutpui lian thlen a tum hi dodal tu an tam hle a, a chhan pawh tualchhung sum tamtak hman a ngaih dawn vangin mipuiin an dodal bakah US khawpui dang Los Angeles emaw San Francisco-in emaw an thlen zawk theih nan an kian a ni. US hian 2024 Olympic leh Paralympic Games thlen an duh a nih chuan September 15 thleng Olympic Committee (IOC) hnenah dilna an thehlut thei ang.
Olympic thlen hi a namai lo hle a, mihring tha leh zung tamtak bakah sum leh pai a hautak hle. England khawpui London-in kum 2012 Olympic leh Paralympic Games a thlen khan India pawisain tluklehdingawn13 vel a senga chhut a ni. Kum 2024 Olympic leh Paralympic Games thleng tur chuan a lo berah India pawisa tluklehdingawn 16 vel sen a ngai tawh dawn a ni.
USOC chief Scott Blackmun chuan, "Kan beisei angin Boston khaw mipuite hnen aṭanga thlawpna kan hmuh ṭhat loh bakah kan khawpui lian dang ten he infiamna kutpui lian hi an thlen zawk theih nan inhnuhdawh hi a ṭha zakin kan hria a ni. September thlaah chuan khawpui dang tan dilna hi kan thehlut tho ang," tiin an ramah ngei Olympic thlen an tum hle.
USA hian kum 1996 khan Atlanta-ah summer games a lo thlen tawh bakah kum 2002 khan Salt Lake City, Utah-ah Winter Olympics a lo thleng tawh bawk.
2024 Summer Olympics..?
IOC chuan kumin Janury 15 khan dilna siam turin sawmna a lo tichhuak tawh a; 2024 Summer Olympics thleng tur hian ram hrang hranga khawpui lian te'n an dil thei a, kumin September 15 aṭanga kum 2016 January 3 thleng IOC hnenah dilna hi thehluh theih a ni ang. A thleng tur ram chu kum 2017 September 15 khian Lima, Peru-ah puan a ni ang.