Blatter hian Nobel Prize dawn a phu - Vladimir Putin

2018 World Cup thleng tur Russia president Vladimir Putin chuan FIFA president kalchhuak tur Sepp Blatter chuan Noble Prize dawn a phu thu a sawi.

Putin chuan, "Blatter emaw khawvela infiamna lam pawl lian tak tak leh Olympic Games hruaitute hian mipui zah nih hi an phu a, Nobel Prize dawn phu ngawih ngawih an awm a nih chuan heng mi te hi an ni ang," tiin Blatter-a chu Nobel Prize dawn phu zinga a tel thu a sawi.

Tun hnaiah eiruk thubuai vangin FIFA a mualpho hle a, US depart­ment of Justice-in FIFA hruaitu ni mek leh hruaitu hlui eiruk thubuai a siamsak 14 zinga pasarih a man hnu lawkin Blatter hi FIFA president-ah thlan nawn a ni a, mahse June 2 khan heng thubuai vel avang hian FIFA president aṭanga a ban tur thu a sawi a ni.

2018 World Cup Russia in an thlen dan tur leh 2022 World Cup Qatar-a nghah chungchangah pawh thil felhlel a awm nia ngaiin Swiss thuneitute chuan FIFA an chhui chiang mek.

Hetiang boruak karah hian Blatter erawh a zam lo a, Swiss pachal chuan nakkum February-a amah thlaktu tur thlanna neih a nih hma chuan FIFA president office a luah rih tur thu a sawi a ni.

FIFA chhungkuaa eirukna hluar chhan a an puh Blatter hi Russia president hian a chhan tlat. Putin chuan, "Tun hnaia Blatter chungchang an sawi hi chu ka hre ṭeuh, thuthang hi a thar a awm reng bawk. Thil zawng zawng sawi a ṭul kher lo a, mahse eirukna a Blatter inrawlh anga an sawi hi chu engmah ka awih lo," tiin FIFA president chu a ṭan hle.

Blatter hian tun thla tir khan a ngaihtuahna chu a fim vek thu leh eiru anga amah puhtu te chu jail a khung tlak hial khawpa mi mawl an nih thu a lo sawi tawh.

Hetihlai hian FIFA chuan tun hnaia FIFA siamṭhatna hna thawk tura an din taskforce hruaitu chu football chhungkuaa mi ni lo, mahni thuneihna hmang thei tur a nih thu an sawi.

Kar hmasa lawk khan FIFA executive committee chuan member 11 awmna tur taskforce din hi an lo rel tawh a ni.

Taskforce hotupa tur anga an sawi Domenico Scala chuan thuneihna pumhlum pek a nih loh chuan taskforce hotu nih chakna a neih loh thu a sawi a, Swiss sumdawng hausa hi FIFA audit and compliance committee-ah thuneihna pumhlum nen chairman a ni mek a ni.

Scala hi kar hmasaa FIFA hnuaia khawmualpui hrang hrang football hruaitute a hmuh hnuin taskforce chairman ni turin thutlukna a siam nia sawi a ni a, mahse Scala thupuangtu chuan, "Scala hian taskforce chairman nih tumin tumah a hmu lo a, chairman tura beisei a ni a nih pawn thuneihna pumhlum pek a nih loh chuan a chelh lo ang," a ti.

FIFA-in ruahmanna a siam dan chuan chairman bakah hian khawmualpui hrang hrang AFC (Asia), CAF (Africa), Concacaf (North, Central America and the Caribbean) leh Uefa (Europe) aṭang tein taskforce-ah hian member pahnih ṭheuh an awm anga, Conmebol (South America) leh OFC (Oceania)-in pakhat ve ve an thawh bawk ang.

September 24 leh 25 hian FIFA chuan Zurich khawpuiah executive committee a nei leh dawn a, he hunah hian FIFA taksforce ruahmannate bihchianna an nei leh phawt dawn a ni.