Villa-ah striker Ayew

Premier League club Aston Villa chuan Ghana striker Jordan Ayew chu kum nga chhung cham turin an la lut, an inremna zat erawh an puangzar lo.

Season hmasa game 31 a khelh aṭanga goal 12 khungtu kum 23-a upa striker hian French Ligue 1 club Lorient aṭangin Upton Park hi a zawm a, kum 2015 Africa Cup of Nations khan an ram Ghana chu pahnihna a nih pui. Ayew-a unaupa Andre Ayew chuan June thla khan Marseille aṭangin Swansea City a lo zawm tawh bawk avangin season tharah an unauin Premier League an khel dawn a ni.

Nikum FA Cup finalist Villa hian an striker Christian Benteke chu pound maktaduai 32.5-in Liverpool lama an hralh bakah captain Fabian Delph chu Manchester City-in an chhuhsak bawk.

Manager Tim Sherwood a enkawl Villa hian tun nipui transfer chhungin Ligue 1 aṭangin Jordan Amavi leh Idrissa Gueye an lakluh tawh bakah Scott Sinclair, Micah Richards leh Mark Bunn te an la lut tawh bawk.