Clive Rice a boral
South Africa leh County cricket club Nottinghamshire captain hlui Clive Rice chu nimin khan kum 66-a upa niin a boral. Rice thihchhan hi thluak cancer vang a ni.
An ram chhung inrelbawlnaa mihangte hnuaichhiahna avangin South Africa hi rei tak chhung chu ODI khelh phalsak an ni lo a, kum 1991 khan khelh phalsak an ni ve chauh.
South Africa ODI match hmasa berah hian Rice chu captain a ni a, kum 42-a upa a ni tawh. He match-ah hian India nen Eden Gardens, Kolkata-ah an intum nghe nghe a ni.
ODI khelh an phalsak tlai avang hian Rice hian a hun tam zawk county cricket-ah a hmang a, kum 1975-1987 kha Nottinghamshire-ah a hun hmangin 1981 leh 1987-ah khan County Championship-ah a champion pui a, cricket a chawlhsan hnuin Nottinghamshire hian coach-ah an ruai chhunzawm nghe nghe a ni.