Pedro-a'n United a hnaih zel em?

Spanish chanchinbu lar Marca chuan kum 27-a upa Barcelona forward Pedro chuan field chhunga hun tam zawk a hman theih nan Manchester United pan a duh niin an ziak a, a chhuak ang em tih hi zawhna awm chu a ni.

Media lam report danin Pedro buyout clause (leichhuah theihna) hi pound maktaduai 22 a ni a, transfer a tlawlh theih nan Barca manager Luis Enrique-a'n theihtawp a chhuah niin an tarlang.

Pedro an fak

Barcelona president Josep Maria Bartomeu chuan, "Pedro hi kan club-ah player pawimawh a ni a, treble champion vawi khatnaah a tel a, vawi hnihnaah a tel bawk. A chang chuan Pedro hian a khel tam tawk lo tih chu ka hria, mah se Barca-in history thar an siamna kawngah player pawimawh a ni. Kan club hi chhuahsan lo se kan duh," tiin Pedro a fak.

Catalan club hi Under 18 player lakluh dan dik loh avanga FIFA hrem lai an ni a, kumin chhungin player an ziak lut thei lo. Hei vang hian player thar Arda Turan leh Aleix Vidal te pawhin nakkumah chauh Catalan club tan an khel thei ang.

Treble champion Barca tan player chhuah hi a finthlak lo a, hrem an tawrh vangin United tan Pedro lakluh a har sawt.

Di Maria thlakna

Manchester United-in an player manto ber Angel di Maria chu Paris St Germain lamah an chhuah dawn niin a lang a, Louis van Gaal-a'n Argentine winger hi cham zel se a duh rualin a thlakna tur a zawng reng bawk.

United hian Lionel Messi, Luis Suarez leh Neymar te awm vanga khelhna hmun chang tam lo Pedro lakluh an tum tih hi thudik a ni a, lei chhuahna tura pawisa ngai zat a tam loh avangin Spanish playmaker hian Catalan club chhuahsan a hlat loah a ngaih theih.