Platini-a'n FIFA president chuh a tum

UEFA president Michel Platini chuan FIFA president chuh a tum a, vawiin hian he thu hi puangchhuak tura beisei a ni.

Platini-a'n FIFA president chuh a tum chhan hi khaw­mualpui pali a football hruaitu ten an ngen vang nia sawi a ni bawk.

Kar hmasa a FIFA executive committee chuan FIFA president ni lai Sepp Blatter-a thlaktu tur thlanna hi nakkum February 26-a neih turin a ruahman a, president chuh tur tan October 26 thleng hming thehluh theih a ni.

Kum 60-a upa France player ropui ṭhin Platini thlawptu khaw­mualpui nia an sawite hi Europe (UEFA) South Ameri­ca (CONMEBOL) North, Cen­tral America, Caribbean (CON­CACAF) leh Asia (AFC) te an ni.

Heng confederation hnuaia ram tin football hruaitute hian Platini hi an thlawp vek a nih chuan vote 144 a hmu dawn tihna a ni a, hei hi vote 209 awmna FIFA presidential election-a vote hmuh ngai zat aia tam daih a nih avang­in Platini hi a ding dawn anih ngat chuan FIFA president thar a ni dawn tih hi chiang tluk a ni.

June 2 khan kum 1998 aṭang tawha FIFA president hna lo chelh chho ngar ngar tawh Blatter chuan FIFA chhung­kuaa eiruk thubuai vangin FIFA presi­dent a nihna chu a chawlhsan tur thu a lo puang tawh a, amah thlaktu tur thlanna neih a nih hma chuan FIFA presi­dent office hi a luah rih ang.

FIFA president chuh tur zingah hian May thlaa FIFA presidential election-a Blatter hneh lotu Prince Ali bin Hussein leh ISL club FC Goa manager Zico te hming sawirik a ni bawk.