India coach-in Saina a ringtawk

Indian badminton coach P Gopichand chuan Saina Nehwal leh Kidambi Srikanth te chungah rinna a nghah ngam thu a sawi.

August 10 - 16 chhung hian Jakarta, Indo­nesia-ah World Championship neih a ni dawn a, he inelnaa tel tur hian India chuan a vawi khat nan hmeichhe world number 2 Saina leh number 3 Srikanth a tir thei dawn a ni.

Gopichand chuan, "Tuna kan dinhmun thlir chuan medal lak ngei kan inbeisei hle. Ranking hi a pawimawh ber chu a ni lo a, mahse a khel ṭha leh ṭha lo teh nan chuan a ṭha tawk. World number 2 leh 3 kan neih avangin ram dang tan pawh kan huphurhawm ve hle ang," tiin a sawi.

India hian player langsar pahnih nei mah se medal lak hi thil awlsam a ni ngawt dawn lo; world number 1 Chen Long hneh tur chuan an vanneih tel a ṭul ang. Chinese superstar kum 26-a upa Chen hian March thla aṭang khan number 1 nih­na ala hauh char char a ni.