TS Zadeng-a'n hmun pawimawh a chang ang - Chawnga

Chanmari West FC-in season thar atana an sawi ngun ber chu team inlungrualna a ni a, player ṭha an la lut lo tihna a ni lo. MPL3 pathumna hian Lunglei FC aṭangin midielder ZD Laltlansanga an la lut.

MPL-a Reitlang FC hruai thlengtu leh Chanmari West FC coach Chawng­thansanga chuan, "Mahuma hmunruak hi TS Zadeng hian a thlak zo ang. Kan game structure hi a la hrechiang tawk lo a, a hriat chian hunah phei chuan ṭangkai lehzualin kan hmang thei ang. TS-a hian killer pass a nei a, kawh takin ball a pet thei a, dead ball a pet thiam bawk avangin kan team-ah hian hmun pawimawh a chang ang," tiin Lunglei tlangval chu a fak hle.

Chanmari West hian MPL2-a Chan­mari FC champion puitu midfiel­der Vanlalhuma chu Dinthar lamah an chhuah.

Chawnga chuan sawi zelin, "Kum 2012 khan TS Zadeng hi ka hre tawh a, tuna kan player pawimawh Lianzama te nen hian ka hre rual. Nikum khan lakluh ka tum tawh a, mah se Lunglei FC tana khelh a thlang zawk. Tuna ka lalut thei hi ka lawm hle a ni," a ti.

MPL3-ah Lunglei FC-in goal 12 an khung a, TS Zadeng hian goal thum a khung. Chanmari West midfielder thar hian Round 14-a Lunglei FC-in Reitlang FC an hneh ṭumin goal awmchhun a khung a, man of the match a thlan a ni.