Kum 2017-ah Van Gaal chawl mai thei

Manchester United manager Louis van Gaal chuan a nupui nena hun tam zawk an hman dun theih nan kum 2017-ah manager hna a chawlhsan mai theih thu a sawi.

Dutch manager hian kum 2017 thleng khi Old Trafford-ah contract a nei mek a, a contract neih lai chu hman zawh duh mah se pawhsei erawh tumna a nei rih lo.

Contract pawhsei chung chang an zawhna chhangin kum 63-a upa Gaal chuan, "Ka nupui hnenah hun tam zawk kan hman dun theih nan ka hna ka chawlhsan tur thu ka lo hrilh tawh a, tunah chuan contract pawhsei lam sawi thei ka ni lo," a ti.

Karleha kum 64 tling mai tawh tur manager chuan, "Kum 55 ka nih lai khan manager hna bansana a bula hun tam zawk hman ka duh thu ka lo hrilh tawh a, mahse tun thlengin club enkawl hna ka la thawk chu a nih si hi. Ka thil duh pakhat chu Premier League champion a ni a, tunah chumi ni tur chuan kan bei dawn a ni," tiin a sawi bawk.

Season thara a hmatawng tur Wayne Rooney chungchang sawiin, "Rooney hian season tharah a tlem berah goal 25 tal a thun theih a inring a, hetiang zat goal khung thei ka nei a nih chuan ka tan midang an ngai chuang lo. Ani hian goal khung turin thiamna leh chakna a neih avangin ka ring tawk," tiin a sawi bawk.

Kum 2011-12 season khan Rooney hian United tan goal 35 a lo khung tawh a ni.