Zo United inpuahchahna a ṭha - Jeje

Indian Super League season khatnaa Indian player zinga goal khung tam ber Jeje Lalpekhlua chuan season thar a­tan­a Zo United FC in­puahchahna a fak.

ISL lama Chennaiyin FC striker Jeje chuan, "Zo United FC hi team ṭha tak an ni. Tualchhung player ṭha an kawl a, coach Sam­son hi hruaitu ṭha a nih avangin season tharah chuan team ṭha ber pawl an nih theih ka ring," tiin a sawi. Zo United FC hi Rei­tlang FC tih ṭhin kha a ni.

I League-a Mohun Bagan champion puitu Jeje chuan sawi zuiin, "Samson hian AFC C Cer­tificate Course a kal vanga training a la kaihruai tam loh erawh a lang a, an fitness pawh a la ṭha tawk lo," tiin an ṭhat lohna lai a sawi lang bawk.

India striker Jeje chuan, "Aizawl FC hi tual­chhungah chuan an ṭha dawn tih a chiang a, mah se I League atan chuan an squad hi la chhah tawk loin ka hria. I League-ah chuan match a tam avangin player pakhat inhliam pawh hi a pawi em em a ni," tiin I League khel tur Aizawl FC chungchang a sawi.

Jeje hi chawlh hmang­in Mizoramah a awm mek a, a fitness tlak hniam loh nan MPL club training hi a zawm.