Guwahati FC trio kan ṭhatpui ang - Ṭhazuala

Mizoram Premier League Season 2 finalist Luangmual FC chu season khat chhung hrem an nih hnuah MPL4 Qualifier champion ni chungin MPL khel turin an tling leh a, MPL1-a an coach Vanlalrova an la lut.

Transfer laia thawm neih len loh vangin Luangmual FC hi champion rinkai zingah an tel pha lo a, amaherawhchu manager Lalṭhazuala chuan MPL tikimtu an nih loh tur thu a sawi thung.

Ṭhazuala chuan, "Guwahati FC aṭang­in Dina Varte, Alex leh Notea te kan la lut a, anni hi kan squad tichaktu an nih ngei ka beisei. Luangmual FC hi hming nei player-ah kan innghat lo a, hmingchher thei tur player kan kawl nual bawk," tiin an squad chungchang a sawi.

Sihphir winger Laldinliana Varte hian MPL1-ah Luangmual FC tan goal thum a khung a, Kanan rawlthar Alex Lalrinnunga hi Mizoram aiawha Subroto Cup khel tawh a ni a, Durtlang striker Lalliansanga hian nikum season ṭan tirh khan Ramhlun North FC tan khelin Aizawl DFA hnuaia season opening-ah top scorer a ni.

Luangmual FC hian Zirtawpni chhun dar 12:30 khian an I Day Football-a an match hmasa berah Chanmari West FC an hmachhawn ang.