Villa mualphona Bamford 3

Aston Villa chu an mumang ram aṭanga tih harhin an awm ta a, league match li zet a zawna an chak hnuin Leeds United chuan 3-0 in an lo sawp. 

Premier League kaithar Leeds goal thum hi Patrick Bamford-a khung vek a ni a, kum 27 mi English striker hian tun season-ah league match ruk khelin goal ruk a khung ta - assist vawi hnih a nei tawh bawk. 

Villa Park-a inkhelah Bamford hian chance a nei hma a, mahse first half-a Jack Harrison-a siamsak pahnih chu awlsam taka khung theih niin lang mah se a khung lo ve ve.

Spanish striker Rodri-go pawh a dang chuang lo - Leeds player manto ber hian chance ṭha a neihte goal-ah a chantir thei lo a, Leeds-in a man atana pound maktaduai 27 an sen ngam chhan a pholang thei lo. 

Villa tan captain duhawm Jack Grealish-a khung ngei tur nia lang chu Luke Ayling chuan goal line aṭangin a pet chhuak hman a, Grealish hian a chance ṭha neih dang pawh a chhawr thei chuang lo. 

Minute 55-na a ni a, Bamford-a'n goal khung loh a duh tawh lo - Rodrigo-a shot Emiliano Martinez-a'n a dan per chu a ke bulah tak a tla a, English striker hian goal-ah a chantir. 

Bamford-a'n a la duh-tawk lo cheu - minute 67-naah penalty box pawn aṭangin mawi zetin a khung a, minute 74-naah Villa defender hual vel kar aṭangin class zetin a khung bawk. 

England boss Gareth Southgate-a'n he inkhel hi a en a nih chuan tlarhmaah duhthlan tur a ngahzia a inhre thar ang a, Three Lions senior team tana la inlan ngai lo Bamford hi a ngaihtuahna tibuaitu zingah a tel ngei ang. 

Leeds boss Marcelo Bielsa chuan, "Kan tan chuan game pawimawh tak a ni a, hnehna chan kha kan phu a ni," tiin a sawi. 

Aston Villa erawh 1930-31 hnua an league match hmasa palia an chak vek record chu a tawp ta a, a zawna vawi nga chaka record thar siam an tum chu Leeds-in an tihtawpsak ta. 

Villa boss Dean Smith chuan, "Ka lawm lo a, a bik takin minute 40 tawp lam kan khelh dan kha ka chhuang lo hle a ni," a ti a, 7-2 a Liverpool sawptu team kha an ang lo.