Goal thun khawl Lewandowski

Bayern Munich striker Robert Lewandowski leh goal chu thil inzawm tlat, sawi hran theih loh a ni. Lewy-a hattrick hmangin Bayern hian Eintracht Frankfurt 5-0 a sawpin table chung lamah an kang sang zel.

Bayern tan hian Lewandowski bakah Leroy Sane leh Jamal Musiala ten goal an khung, German champion hian point thum hlu tak an hlawh chhuah bakah an striker duhlai hian record ropui a siam bawk.

Poland internatonal hian tun season league match panga aṭangin goal 10 a khung tling der tawh! hetiang ti thei hi player dang an la awm ngai lo, season hmasa inelna hrang hranga goal 55 khungtu hi kum 32 mi ni tawh mah se a vanglai a hmang.

Point thum an hmu a, striker Lewandowski-a record ropui bawk mah se Bayern Munich lawm a kim lo. Defender Alphonso Davies chu a ke rek hliam vanga lak chhuah a ngai, Canada international hi a chawlh chen tur la chiang lo mah se kar riat vel tal a chawlh a ngaih hmel.

Bayern manager Hansi Flick chuan, "Hmun hnihah a hliam niin kan hria, kar ruk aṭanga kar riat vel a chawlh kan ring. Ani ang player theihna nei sang a chawl tur hi chu kan tan channa lian tak a ni," tiin a sawi, thlasik chawlh a awm bawk avangin kuminah Davis hi a hmel kan hmu tawh dawn lo tihna a ni.

German champion hian Bundesliga match nga an khelh aṭangin point 12 an hmu a, pahnihna dinhmun an luah. Match khelh zat inangah RB Leipzig chu point khatin an phak lo mek.

European champion Flick-a naute hian Thawhlehni zanah Champions League group match khel turin Lokomotiv Moscow an lenchilh zui ang, kumin UCL an match hmasa zawkah Atletico Madrid chu 4-0 in an lo sawp tawh a ni.