Manchester City an chefuh thei lo

West Ham United-in Inrinni zan khan Premier League champion rinkai Manchester City chu 1-1 in an chelh a, Pep Guardiola hote hi si phurh suttu zawk an ni.

London Stadium-ah Michail Antonio-a'n minute 18-na lekah Hammers tan bicycle kick hmangin goal hmahruai a khung a, Man City-in substitute Phil Foden hmangin minute 51-naah an sut.

Man City-in inkhel an thunun a, ball possession pawh 70% hial nei mah se hnehna an chang thei lo. Pep Guardiola hian chak ngei tumin bench aṭangin Kevin de Bruyne pawh a luhtir a, Belgian midfielder awm hnuah goal a luh belh lo.

Chutihrualin hun tawp lamah Man City goal nawr a na takzet a, Lukasz Fabianski-a'n De Bruyne bakah Raheem Sterling leh Riyad Mahrez te goal khung ṭha zetin a dansak bawk.

Man City hian tun ṭuma an inhnehtawk hma hian Hammers hi an intawnna hnuhnung pariatah an hneh vek a, goal difference pawh 25-3 a ni hial. Tun season-ah erawh Pep Guardiola hote an chefuh thei lo a, match nga an khelh tawhah vawi hnih chiah la chakin vawi khat a chak lo.

Spanish manager Guardiola harsatna belhchhah turin Sergio Aguero-a'n inhliam vangin second half a khel lo. Argentina international kum 32 mi hi thla li chhung khup hliam vanga a chawlh hnuah kar liam ta khan rawn kir leh chauh a, a chawlh hun tur a la hriat loh. 

Man City forward dang Gabriel Jesus pawh inhliam vangin a la chawl mek a, Pep Guardiola tan insiamṭhat a harsat phah ang. English club hian Thawhlehni zan hian Marseille an hmachhawn dawn a, kar tawp Premier League-ah Sheffield United an lenchilh leh ang.

Manchester City manager Pep Guardiola chuan, "Nakin hun tur sawi lawk mi ka ni lo. Ka hriat chian erawh point sarih kan hloh tawh a, a tam takzet. Kan talbuai hi chhan hrang hrang vang a ni. Kan match khelh leh tur zel kan ngaihtuah ang," tiin a sawi.