Goa-in Mohammedan an hneh

Thawhlehni zan Indian Super League inkhelah FC Goa-in Mohammedan SC an mikhual a, inkhel awmze nei tawh loah Goan club hi 2-0 in an chak - Iker Guarrotxena leh Padam Chhetri (own goal) ten goal khat ve ve an khung a, Kolkata club-in a chhanletna tur an nei lo.

Goa hian minute 40-naah goal hmahruai an khung a, Athletic Bilbao academy chhuak goal khung hi Ayush Chhetri siamsak a ni - Dejan Drazic-a ball thlawh luh chu Dinthar tlangval hian lo tauhin, Guarrotxena khung turin a siamsak ve leh a ni.

Goal dang a lut lo reng a, hun tawp nan minute li chiah a awm tawh tihah Guarrotxena bawk a inlar leh a, corner aṭanga ball kal a tauh chu Mohhamedan keeper Padam Chhetri chuan an lamah a tilut a, 2-0 in Goa an chak.

Mohammedan tan hian Joe Zoherliana, Vanlalzuidika Chhakchhuak, Lalrinfela Khiangte leh Lalremsanga Fanai ten inkhel bul an ṭan a, an team erawh an chakpui zo ta lo.