Goal sur tirtu Arsenal

Arsenal chuan PSV Eindhoven 7-1 in an sawp! Mikel Arteta naute hian Champions League quarterfinal la lut chiah lo mah se, an lut ngei dawn tia sawi ngam a ni.

European football inelna sang berah, knockout stage chinah Arsenal hian khualmaula goal sarih khung thei hmasa ber niin record thar an siam a, an tan chuan mellung pawimawh leh chhinchhiah tlak bik a ni ngei ang.

Thawhlehni zan Philips Stadion-a inkhelah, mikhual Gunners tan hian captain Martin Odegaard chuan goal hnih a khung a, defender Jurrien Timber leh Riccardo Calafiori te bakah a hma lama awm Ethan Nwaneri, Mikel Merino leh Leandro Trossard ten goal khat ṭheuh an khung bawk.

Arsenal hian tun hnaiah goal khung an harsat ṭhin, an match hnuhnung pali zinga pathumah goal an khung lo. Kai Havertz, Bukayo Saka, Gabriel Jesus leh Gabriel Martinelli ten an hliam avangin an buai hi a mak lo.

Mahse, PSV mualah erawh a khat mawi tawkin goal an khung reng. Premier League lama an beiseina a thamral mek laiin Champions League-ah hlimna an hmu a, an hmabak erawh a awlsam dawn lo - Real Madrid leh Atletico Madrid inkhela chak zawk an tum dawn a ni.

Arsenal manager Mikel Arteta chuan, "Kan khelh danah ka lawm, football-ah chuan ni rei lote chhungin thil a danglam vek thei tih a takin an hmu. Tuna kan chakna hian inrintawk leh boruak ṭha zawk nasa takin min siamsak ngei ang.

"Midangin an la tih theih ngai loh kan ti a, chumi hun tawng vetu ka ni hi a nuam ka ti, ka hlimna ber zawk chu ṭha taka kan khelh bakah round sang zawk luh beisei awm taka kan awm thei hi a ni," tiin a sawi.

Gunners tan hian tun season kal laiah Premier League beisei san ngam a harsa tawh, beisei bo vek erawh a la ni bik lo. Pathianni zan hian Manchester United an lenchilh dawn a, an tan inkhel pawimawh bik a ni ang.

Arteta chuan, "Old Trafford-ah kan lut zui leh dawn a ni a, khualmualah ṭha taka khel chungin hnehna kan chang thei a ni tih hre chungin kan inkhel ang," tiin a sawi a, kar tawpa an match khelh turin a rilru a luah tih a chiang hle.