Aston Villa an chak

Premier League club Aston Villa-in Europe-ah mangram an chen zel - Thawhlehni zan khan Unai Emery naute hian last 16 first leg-ah Club Brugge chu 3-1 in an hneh a, an ke lehlamin quarterfinal an rap tawh, tiin a sawi theih.

Villa tan Leon Bailey chuan minute thumna lekah goal hmahruai a khung a, Marcus Rashford chuan khung belhna remchang tak nei mah se, Liverpool goalkeeper hlui Simon Mignolet chuan ṭha takin a dansak.

Belgium-a inkhelah Villa hmahruai chhung a rei lo. Club Brugge-in goal an chhuah aṭanga minute kua hnu lawkah an khung ve leh a, Maxim de Cuyper chuan si phurh sutna goal a khung.

Jan Breydel Stadium-a inkhelah team pahnih an inngam tawk viau a, chak tur zawk rinthiam a harsa. Mualneitu team tan captain Hans Vanaken chuan uiawm takin a hlah a, Christos Tzolis chuan yard riat vel leka hla aṭangin a hlah bawk.

A tawpah Villa vanneihna a her chhuak - minute 82-naah Belgian club an chesual a, centre back Brandon Mechele chuan Morgan Rogers-a corss dan a tumna lamah an lamah a tilut a, 2-1 a ni.

Villa vanneih a kaltluang laklawh. Hun tawp nan minute hnih chiah a awm tawh tihah Matty Cash chuan penalty a hlawh chhuak a, bench aṭanga luhtir Marco Asensio chuan goal-ah a chantir - Real Madrid player hlui Asensio hian Villa a pan hnuah match sarih khelin, goal nga a khung ta.

Unai Emery enkawl Villa hian March 12, Nilaini zanah second leg khel turin Club Brugge hi an mikhual ve leh dawn a, quarterfinal an lut a nih chuan Liverpool leh Paris St-Germain inkhela chak zawk an hmachhawn ang.